電動車 市場發展前景

電動車喺香港市場仲未普及，反觀歐美及日本地區就好景得多，唔只有當地政府大力支持，車種選擇又多，正因為咁，德國TUV集團日前公布咗「2011年全球消費者電動車使用意願大調查」結果；對於未來五年電動車市場發展得最快嘅國家預測，有啲令人跌眼鏡，答案唔係歐洲或北美地區，而係中國及印度！

有關調查主要針對全球12個主要市場，包括中國、丹麥、德國、法國、印度、以色列、意大利、日本、葡萄牙、西班牙、英國及美國，受訪人士為年齡超過18歲嘅駕駛人士，每個地區分別有500人以上，總受訪人數多達6,421人。對於「喺未來五年有意選購電動車」嘅問題上，Say Yes嘅中國及印度人士最多，分別佔咗今次受訪人數嘅88%及92%；當問到「睇好電動車或汽油車嘅發展機會」時，中國及印度嘅大部分受訪者都對電動車表示好感，相反德國及日本嘅消費者就對電動車未算太受落，其中日本消費者嘅購買電動車意欲只有34%。至於「電動車品牌認知度」方面，豐田（Toyota）於各地嘅調查都取得出色成績，所佔百分比高達34%，隨後分別為17.2%嘅本田（Honda）、15.9%嘅Volkswagen、14.6%嘅日產（Nissan）及11.7%嘅福特（Ford）。