CES 2012 拉斯維加斯直擊 Samsung雙核SMART TV 飛甩Remote

內置雙核處理器，支援Multi-tasking，機頂再設鏡頭支援Face Detection及體感操控，兼有五種顯示屏尺寸畀大家揀，大家會唔會以為又係講緊Samsung新GALAXY手機或Tablet？其實以上規格係Samsung剛在CES展覽上所展出2012年旗艦電視ES8000的規格至真。佢再加送特幼邊框、超薄機身，以及變得更Smart的「SMART TV」功能，可以用聲控或動作體感控制電視，以後電視機唔止要睇得靚、多Apps玩，操控仲夠晒Free！

SMART TV功能再強化

今年入場一睇，多間一線甚至二線電視廠商都紛紛掛上「SMART TV」旗號來宣傳新電視機，區別可能只在於「SMART TV」所用上的字體，但邊間先至真正最Smart呢？Samsung今年的SMART TV已發展到第二代，不單止網上內容豐富，還配合新設計的「Smart Hub」介面來簡化操作；而今年除「Smart Content」之外，再引入「Smart Interaction」和「Smart Evolution」兩種新Smart概念，其他廠暫時未跟得到。新旗艦電視ES8000系列就內置雙核處理器來支援Multi-tasking，下載新Apps時都可順暢地上網外，還有新增的機頂鏡頭，玩到Skype之餘，更可以對應「Smart Interaction」互動功能。

聲控體感操作兼插卡升級電視

「Smart Interaction」主要用來簡化電視操作，可透過聲控和真正體感動作操控電視，例如只要對ES8000講「Hi TV」就可開機進行聲控操作，再講「Volume Up」、「Channel Down」就可調校音量同選台，可是現時只支援英文，不過並唔需要特別練習發音便可即時使用。此外，跟電視講「Smart Hub」就可進入新「Smart Hub」介面下載Apps兼上網，這個時候更可用埋手部體感操作，擺動手掌當Cursor使用，握緊拳頭代表揀選相關設定，以後睇電視就唔使再用遙控器。

至於「Smart Evolution」則是個有趣的概念，可以透過每年插入晶片提升電視功能，就算電視機用了幾年都唔怕跟不上時代，不過CES現場未有進一步資料展示。至於旗艦級ES8000的機身規格則採用LED背光技術，改以新U形底座設計再配合特幼邊框，觀感進一步提升，另亦大包圍式推出46吋、55吋、60吋、65吋和最大的75吋型號，總有一款啱大家心水。

55吋Super OLED靚到嚇親

除SMART功能翻新之外，OLED也告正式登場，唔止Samsung，多間電視大廠都有展出大尺寸的OLED電視，預計今年年中將會陸續推出市場。Samsung出品的是一款55吋的Super OLED HDTV，擺在展區入口位置，機身薄如紙，顏色顯示又靚得誇張，用來吸客就最好不過。雖然Super OLED HDTV區域被欄杆圍起，小記無法量度厚度，但據估計55吋Super OLED HDTV厚度約在四至五毫米之間，薄得誇張！可是，大尺寸OLED成本不菲，現場都未有電視廠商敢打價，只希望到下半年供貨時不要貴得誇張就好！

膽機設計今年上位

今年Samsung值得留意的，就是內置「真空管」放大器的DA-E750。DA-E750是最高階音響產品，配備GALAXY手機、Tablet以及iOS產品通用的雙插座2.1聲道Airplay喇叭，無論是全鋼琴黑抑或仿木紋設計的機身，都甚有睇頭。會場亦設有試音室，Samsung以體積跟定位相若的Bose iPod喇叭比較，DA-E750人聲表現更清澈嘹亮，始終膽機音質確實高一班。現場消息表示，產品約於五月推出，價位跟高級iPod喇叭相若。除DA-E750之外，另一套全新7.1聲道3D藍光家庭影院系統都會採用真空管放大器，但展覽現場未有得試音，有少許遺憾。

第二代Series 9再破輕薄紀錄

Series 9是近一、兩年少有的Premium Notebook，今年CES，Samsung就發布第二代Series 9，並推出13吋及15吋型號，其中15吋型號機身僅厚14.9mm，重量僅1.59kg，比同級產品輕薄很多，操作時間更長至十小時；而厚12.9mm的13吋型號亦比第一代薄28%。新Series 9起動時間極快，最快只需9.8秒便可Boot機，睡眠模式下開機只需1.4秒。至於另一款新機是Samsung自家首款UltraBook Series 5 ULTRA，備13.3吋（厚14.9mm）及14吋（厚20.9mm但內置Super Multi Drive）兩款選擇，內置16GB ExpressCache，20秒可着機，而且這幾日就會在香港推出，換機正是時候！

GALAXY Note變畫板

或者可以咁講，Samsung一有新流動電子產品都會即時在香港推出，所以今次在CES展出未在美國推出的GALAXY Note跟GALAXY Tab 7.7 LTE版，對香港讀者來講的確新鮮感欠奉。至於2012年全新機種，應要到二月底Mobile World Congress展覽才公布。不過Samsung行銷手法都確實幾值得學習，將擁大芒的GALAXY Note當作神奇畫板般推銷，場內場外都有駐場插畫師免費幫大家在GALAXY Note上畫張漫畫人像，要知道去遊客區幫襯街頭藝術家畫漫畫都唔平o架！