Batman Cute得起
Hybrid Metal Figuration Series一連出咗米奇、米妮、胡迪三款迪士尼角色，位位得意可愛，嚟到第四彈Cute依舊，不過轉由Marvel台柱級角色嘅蝙蝠俠擔綱；型英帥嘅Batman就見得多，Q版款式你又見過未？
大玩着燈功能
雖然Q版Batman Size細細，不過Gimmick唔少，好似斗篷就有硬身嘅膠料及軟身嘅布料兩款任換，布料款式嘅邊緣仲內藏鐵線幫助定形，而且夠晒大塊，可以遮晒蝙蝠俠成個Body扮神秘。另一特色係蝙蝠俠嘅眼睛有着燈功能，先打開後腦塊蓋，之後入電、啪掣即可，隨盒嘅蝙蝠訊號燈一樣發到光，擺喺特製嘅黑櫃內就零舍有Feel。
換斗篷小心分屍
Q版公仔一向唔標榜可動性，今次嘅Batman都唔例外，手腳只係用咗單關節，仲可以應付到一般嘅舉手、起腳等動作，猶幸身形比例嘅拿捏上有心思，唔會頭重腳輕企唔穩。不過換斗篷時要先轉鬆背部嘅螺絲，加上本身嘅膠斗篷太過硬身、唔易拎開，鬆螺絲時唔小心嘅話，隨時手、腳、頭齊齊飛脫，死狀甚慘，各位Batman粉絲把玩時務必要高度注意。
查詢：2578 1826
Hybrid Metal Figuration Series Batman 售價：$650
隨盒附送一支蝙蝠鏢，仲跟多隻專用手掌，拎起上嚟分外穩陣。
布料斗篷大大塊，仲內藏鐵線定位，擺甫士特別有型。
手、腳只用單關節，仲可應付簡單嘅舉手投足動作。
想玩「金睛火眼」？先要打開頭蓋放入電池。
要用力轉開膠斗篷，先見到背部中間嗰粒螺絲，換件有啲麻煩。
蝙蝠俠嘅雙眼及蝙蝠訊號燈，都有入電着燈功能。