租車拜年　行動要早

農曆新年只有三日公眾假期，要逐一到分布港、九、新界嘅親友家中祝福問好，始終有部車用方便啲。今年多間租車公司都推出農曆新年租車優惠，四日三夜租車套餐可以平至$2,275有交易。由於農曆新年期間嘅租車市場需求非常大，尤其係七、八人車，唔想成家人喺街同人逼巴士、爭的士，就要快手喇！

七、八人車載得人多，好適合一家大細去拜年，缺點係車身重，耗油量比大部分1.5私家車高，所以如果預算用唔着咁大部車，揀車仔其實先划算，而且易操控。汽車科技日新月異，近年唔少新車都改用電子手掣，部分仲有「Auto Hold」、「Auto Start/Stop」等電子設備，不論閣下牌齡有幾耐，唔知點用就一定要向車行查詢清楚，以免臨急周章！仲要提提各位，停車熄匙條例已經生效，停車等親友記得熄引擎，否則有機會被票控、罰款$320，新年流流畀人抄牌就唔好意頭啦。

攞車前Check真啲

喺租車公司攞車前，記得檢查清楚部車嘅狀態，譬如車身有冇凹痕、輪圈有冇刮花等等，如有發現，要立即通知租車公司負責人，將有關問題嘅地方記錄在案，避免還車時有爭拗。此外，部分規模較大嘅租車公司仲有電動車出租，租車前記得問清楚點樣充電，並且索取電動車充電設施位置資料，半路中途冇電「跪低」搵拖車就無謂；目前全港約有330個充電站，其中三個設有快速充電器，以日產（Nissan）Leaf為例，只需30分鐘就叉到八成電，滿電之下最高續航力為160km。如果要一日走勻港、九、新界多個地區，路程長達二、三百公里，都係傳統汽油私家車啱用啲。

年輕之選 Opel Corsa（a）$2,275/4日

造型年輕化，雖然三門設計出入車廂唔算不便，不過對兩公婆嚟講就啱晒，前面坐人、後座擺禮物，而且操控靈活，畀太太揸都好易Handle。

貴氣之選 Mercedes-Benz S350L $8,840/4日（a）

S-Class係頂級豪華轎車代表之一，除咗賣相夠台型，乘坐質素亦舒適無比，揸去拜年夠晒派頭。S350L搭載272hp嘅3.5公升V6引擎及七速自動波，配合電子氣壓避震，快得嚟又夠定。

七人之選 Toyota Wish 1.8 $4,600/7日（b）

採用2+3+2座位布局，前、中、後三排都有充裕空間，而且可按需要收摺座椅，騰出更大嘅載物空間。動力方面，1.8公升Valvematic引擎動力輸出充裕，而且耗油量唔高，甚至可低至16.7km/L。

環保之選 Nissan Leaf $2,860/4日（a）

Leaf嘅動力技術稱得上非常成熟，電力系統穩定可靠，最高續航力又去到160km，用快速充電器嘅話，30分鐘就叉到80%。不過目前只有鴨脷洲、佐敦及香港科學園設有快速充電器，未夠方便。

方便之選 Nissan Serena $3,640/4日（a）

最大賣點當然係車廂夠大，滿坐七個成年人都唔覺擠迫，若果唔使坐滿人嘅話，就可以透過放平後座、增加車尾載物量，擺到多件大型行李，更抵讚係設有雙趟門，加埋低地台設計，長者、小孩都可輕鬆上落。

慳家之選 Honda Jazz $2,275/4日（a）

擁有一副型格賣相，投產以嚟都深受年輕用家歡迎，至於1.3公升引擎配合無段變速波箱，可以輸出86ps馬力，而且超級慳油，以依家油價計算，分分鐘做到$1.2/km樓下，揸長途車都唔怕肉赤啦！

海外租車香港辦手續

唔少港人鍾意自駕遊，相信好此道者都試過喺海外租車出現「雞同鴨講」嘅情況，特別係一啲非旅遊區嘅小鎮，出動埋身體語言、畫公仔都唔掂。為咗方便自駕遊市民，部分租車公司提供代辦海外租車服務，喺內地、日本等多個大城市都可以攞車，而且大部分手續都可以喺香港辦妥，唔使再怕言語不通。

查詢：a.2768 2277（大昌行汽車租賃）、b.2880 1515（皇冠汽車租車部）