《忍道2 散華》　潛入暗殺要靠捽

數數手指，幾隻PS Vita護航大作《Uncharted: Golden Abyss》、《真．三國無雙NEXT》、《Ultimate Marvel Vs Capcom 3》等系列作都出得幾密，出機時想搭多隻有「新鮮感」的PSV遊戲，就可考慮扮吓忍者殺敵完成任務的新作《忍道2 散華》，遊戲可以活用到PS Vita主機的機身前後輕觸介面來鎖定、潛伏、擲手裏劍及刺殺，而且高解像度畫面相當有水準。

《天誅》工作室開發

忍者遊戲都有好幾套，比較出名好似有《天誅》同《忍者外傳》等，相對下《忍道》系列好似較低調，因為對上三款《忍道》系列，分別係PS2的《忍道 戒》及《忍道 匠》，以及PSP的《忍道 焰》都已經係05年、06年作品，唔似其他作品每年或隔年就出新一集。不過大家都唔使擔心《忍道2 散華》會唔會追唔上時代，因為背後搞開發的正是同時推出《天誅》系列、《侍道》系列的Acquire，水準有保證，而且故事背景設計得更弔詭，講述日本室町時代後期（即係15XX年）發生了「宇高多之亂」後再生動亂，玩家所操控正係一條被滅族忍者村的幸存者「火祭之禪」，目的就係報仇。

接Job賺錢左右局勢

不過主角「火祭之禪」係一個Freelancer，透過有趣的「切腹引擎」任意接受當時宇高多三大勢力「一条家」、「風天家」同「阿無璃他教」的任務，接Job賺錢的同時，每完成一個任務後都會增強或削弱某個勢力集團的軍事力、兵糧等，因而衍生出唔同的局勢，並非得一條主線打到尾的局面。可接受的任務都相當多元化，包括有暗殺、全滅、決鬥、偵查、護衞、輸送、強盜、誘拐、救出等等，如果執行任務時同時完成埋特定條件，仲可以賺得更多錢購買裝備。動作表現亦相當豐富，比較有趣係可利用鈎鎖爬上高處或飛越建築物，亦能夠運用四肢支撐布幕扮成蝙蝠般滑翔，避開地面的守衞深入敵陣。

一捽瞄準擲手裏劍

雖者忍者精髓係靠「忍」，以敏捷身手潛入完成任務，不過執行任務時唔好彩被發現，兼且仲要畀大量敵人圍劈時，遊戲容許玩家使出必殺技「斬刻」，長按三角形掣就可以令時間暫停，趁機一口氣解決大量敵人，但要留意係「斬刻」時間有限，用完就要再儲過。另外今集設有獨特的「血祀殺法」，只要在不被發現的情況下潛伏到敵人背後，趁敵人頭頂有閃光時出刀就可一下KO他，而且唔會引起其他敵人注意。遊戲新元素還有新操控方法，就係可應用到PS Vita遊戲機底面兩個輕觸介面新功能加強玩味。進行遊戲時，畫面左右方都會出現唔同Icon，一篤Icon就可鎖定敵人或開啟地圖，而機背就用以在遠距離狙擊敵人，捽捽機背瞄準敵人再擲出手裏劍，操控時確實比齋用按鈕準繩同靈活得多！

INFO

類　　型：忍者動作

開　　發：Acquire / Spike

平　　台：PS Vita

推出日期：已推出

售　　價：$388

查　　詢：2341 2356