32,000人富士山下開P Nismo Festival 2011

對大部分香港人嚟講，汽車可能只係用來代步，想買車，就逛車展或者去陳列室；部車有唔妥？搵車房師傅睇睇囉；車身污糟咗，幫襯洗車公司……相信點都唔會諗到搞番個汽車節。日本人就好唔同，唔只愛車，仲將汽車文化升格，早前筆者就到富士山下嘅富士國際賽車場（Fuji Speedway），參與每年一度嘅Nismo Festival，同3萬2千幾人一齊盡興，High得很！

雖然香港都有唔少車會，會員間中會約埋一齊遊車河、BBQ，不過點都唔及萬人空巷嘅Nismo Festival咁熱鬧！顧名思義，呢項活動由日產（Nissan）官方改裝部門Nismo於1997年創辦，今次已經係第15屆，選址靜岡縣嘅富士國際賽車場舉行。除咗有賽車活動，仲展出日產多年嚟嘅經典名車，由上世紀50年代嘅Datsun型號到最新嘅Leaf Nismo RC都有，場內攤檔又老少咸宜，既有Nismo嘅改裝部件，又有Tomica車仔，加埋超索Racing Girls滿場飛，就算你唔係日產車迷，到此一遊都會開心到痹！

無差別名車大亂鬥

置身Nismo Festival，可以完全感受到日本人愛車之情原來係咁狂熱，回想12月4日大清早八點，氣溫只有6℃，但係賽車場內由觀眾席到走廊早就塞爆人，有成三萬幾位車迷入場，而且層面極廣，不分男女、一家大細都有，墟冚過香港嘅賀歲盃。

正如活動主題「Nissan Racing DNA」，今屆Nismo Festival嘅主菜，一如以往落於唔同組別嘅賽事身上，最難得係壓軸嘅混合大賽，不分車齡、型號，由昔日嘅24小時耐力賽戰車，到JGTS及Super GT等類別嘅車款，例如370Z及GT-R35嘅賽道改裝版，都一齊落場鬥一番，勝負反而冇乜人計較，最重要係睇到唔同年代嘅日產名車生生猛猛咁喺場上你追我逐，無論你係80前或者80後，都會興奮到彈起。

GT-R小車迷想當車手

賽道上風馳電掣，賽道外人頭湧湧，事關有唔同種類嘅展覽、遊戲及銷售攤位，後者更加由汽車部件，到汽車雜誌及模型車都有，大人、細路都可以喺度執到寶，而且個個都高度專注，對筆者嘅鏡頭視若無睹，一副「唔怕你影，唔好阻我搵筍貨就得」嘅態度。筆者喺Tomica車仔檔遇到只有六歲嘅Sato（音譯），不厭其煩多次提問，佢終於喺揀到心水車仔後答我問題：「我最鍾意GT-R，我希望將來做個賽車手。」果然有大志！日本人愛車成狂、又有深厚嘅賽車文化，點似「鍾意食同一種食物，睇同一種電視節目……This City is Dying」嘅香港人咁悶吖！

靚女氾濫

但凡賽車活動，梗係唔少得Racing Grils，Nismo Festival 2011都唔例外，而且重質又重量，賽道賽外，行兩步就總有一個喺左近，個個都標致可人，比香港嘅o靚模養眼得多，作為男車迷，你話去到又點會唔開心呢？

氣候添難度

位於靜岡縣駿江郡小山町嘅富士國際賽車場始建於1960年代，並於76年成為日本首次舉辦F1嘅場地之後喺2007及08年都辦過F1，現時主要舉辦日本大獎賽、JLMC及Japan GT等大賽。賽道全長4.563km，共有16個彎位，闊度介乎15至25m，整體標高就於545至580公尺之間，加上當地天氣好唔穩定、氣壓又低，夜間仲經常出現氣溫驟降嘅現象，對參賽車款嘅進氣設計，以至輪胎選擇都構成更大考驗，難度大咗，自然更添賽事可觀性。

特派記者：Samuel（部分相片來自Nismo Festival 2011 Facebook專頁）

鳴謝：合誠汽車