Renault Twingo 畀你話晒事

早前喺法蘭克福車展亮相嘅雷諾（Renault）Twingo，廠方最近公布咗詳細規格，汽油及柴油引擎各有兩款，馬力由75至100hp不等，最吸引係有多樣化個人選項，輪圈就有多達24款，就連側鏡冚及門邊飾條顏色都有得揀，輕易打造出個人化版本，即使未掛車牌，車主都可以好肯定咁同人講：「That's My Twingo！」

與2007年推出嘅第二代Twingo相比，今次小改款嘅外觀更活潑、前衞，鬼面罩跟同門嘅DeZir、Captur及R-Space等Concept Car相似，並將霧燈置於頭燈組下方，變化之大已超越一般嘅Facelift水平。此外，廠方喺Twingo嘅原有車身顏色上，新增Fuchsia及Bermuda Blue兩種暖色，部分市場仲有電動天窗作選配。車廂設計同樣多變化，軚環、飾板、出風口以至座椅皮料統統有得揀，輕易搭配出合乎個人心意嘅流動空間。

一缸油可使一個月

動力方面，廠方為Twingo提供汽油及柴油引擎各有兩款，高性能嘅1.2 TCe汽油引擎可輸出100hp馬力及15.8kgm扭力，另一款則為75hp馬力。若想進一步慳油，大可留意柴油引擎，dCi 75和dCi 85均可做出3.4L/100km嘅超低耗油量，二氧化碳排放更順應低至85g/km，同時通過歐盟五期嘅排放標準，潔淨又環保。廠方指方入滿油嘅Twingo最大續航距離達1,000km（柴油版）或750km（電油版），作為城市代步車，一缸油分分鐘夠使一個月。

專用Apps提供慳油貼士

Twingo主打年輕人市場，車廂配備就作出相應調整，音響系統備有藍芽及USB接口，可直接從數碼播放器讀取音訊，而且另有高階音響系統作選配項目，除可接駁iPhone、iPod Touch及加入GPS導航系統外，若配合雷諾開發嘅iPhone Apps，更可即時分析駕駛者嘅「eco-driving」態度，給予節能駕駛貼士。據知新Twingo將於明年初率先在歐洲上市，惟車價及輸港機會仲係未知數，若果低於HK$150,000嘅話，相信在港大有市場。