足料炮製SH Monster Arts斯拉大戰

日本特攝片超人和怪獸的角色可說是多不勝數，講到最深入民心嘅日系大怪獸，一定非哥斯拉（Godzilla）莫屬，佢首次亮相於1954年推出嘅同名電影，算得上係日本怪獸電影嘅始祖。咁經典，Bandai又點會錯過，早前SH Monster Arts系列就選中咗哥斯拉，而且一口氣出齊原祖及機械哥斯拉，等各位「斯拉迷」可以喺屋企重現呢兩位斯拉嘅大戰場景。

哥斯拉唔只喺日本大受歡迎，甚至賣埠到美國，堪稱特攝片嘅票房保證，自然長做長有，所以哥斯拉電影都有好多套，講述哥斯拉與機械哥斯拉就有《哥斯拉大戰機械哥斯拉》、《哥斯拉再戰機械哥斯拉》、《哥斯拉×摩斯拉×機械哥斯拉》，三部片之中嘅機械哥斯拉造型都相當唔同，今次SH Monster Arts就採用咗1993年嘅《哥斯拉再戰機械哥斯拉》版本。

原祖篇 睇得唔郁得

講番SH Monster Arts嘅哥斯拉，塑料Body做得幾有誠意，皮膚表面嘅凹凸不平做到足，背部嘅鰭片亦好有質感，眼睛亦做到電影中嘅兇狠凌厲。最抵讚係身體各處關節都做足隱藏工夫，特別係頸部及尾部都加入一小節部件，遮蓋關節位，令整體造型完整好多，唔似以前嘅可動哥斯拉玩具咁款斷開晒。美中不足係可動性只屬一般，腳部嘅提高幅度唔多，更加唔好諗住擺屈膝甫士；頭部雖然可以左右轉動，但係「誓不低頭」，擺甫士都有幾大限制。比較滿意算係尾部，長尾巴嘅扭動幅度比想像中多，S形或者翹起尾尖都做到。

山寨篇 關節配件雙贏

電影中機械哥斯拉係人類嘅山寨版產物，用嚟對付原裝正版，相比起「全膠宴」嘅原祖，SH Monster Arts嘅機械哥斯拉就多番啲金屬感，表面嘅銀色塗裝油得唔錯，腰間關節仲用咗金屬物料，所以都幾墜手。而且整個Body都有唔少關節，腳部提得起，條腰又可以左右擺動，不過同哥斯拉相反，個頭抬唔起，好在隨盒有一個飛行模式專用嘅頸部配件，換咗之後就可抬起頭做人。講到配件，哥斯拉基本上只得一個初回特典嘅熱射線特效組件連專用地台，機械哥斯拉就多啲，有激光線特效組件及地台外，仲有多一對手掌、腰間能量儀及唔同造型嘅尾部組件，可惜仲係欠咗冷凍炮戰機Back Set，因為Bandai已經留番嚟做明年三月嘅「魂Shop」配件出售再賺多筆啦！

查詢：2433 1828（瑞華行）

攝：Stella