AGS 着數預告

亞洲遊戲展（AGS）2011明天就會在會展揭幕，除了焦點PS Vita手提遊戲機開賣外，其實場內仲有唔少着數優惠，包括焦點Online Game以及本地開發遊戲益大家。而大會亦搞搞新意思，特別搵型男在女士專區教打機，又設有「亞洲遊戲．光影十年」展出多款經典遊戲機，以及再次舉辦Miss AGS選舉，咁就逛多兩次都冇問題啦！

買滿$6,000送Uncharted旅行篋

聖誕檔期最啱就係消費，入場掃遊戲機、遊戲碟或者遊戲精品就最好不過。AGS主要參展商PlayStation今次推出了大量消費優惠，好似每日在PlayStation攤位內購物滿$6,000的頭100位買家，都可獲贈「Uncharted 3」限定版旅行篋一個；而買滿$4,500以上，便可得到設計幾型仔的「PlayStation 8GB USB卡片」。想買遊戲精品亦都有好多選擇，在Skywards攤位內更會發售多款會場限定高達、幪面超人系列等，另外PS吉祥物TORO貓跟KURO貓的精品都有得賣！

盡玩本地原創遊戲

在AGS除可玩到多款PS3、PSV遊戲新作之外，今年大會更宣揚本地原創精神，找來數間本地遊戲公司參展，當中包括香港規模最大的Online遊戲公司之一的Gameone，並以剛推出的《闇三國Online》作主打。至於Kalloc Studios（凱樂工作室）及Gamespace這兩間本地公司，知名度雖未算高，但就相當有創意，如Kalloc會展示出以60年代香港地標做背景的3D遊戲模型及玩法，而Gamespace就展示針對女機迷而設的新遊戲《為食寵物街》，更會在女性打機專區展出添！

專區展示經典遊戲機

10年前大家玩緊邊款遊戲機？今年大會就繼續大玩「那些年」橋段，特設「亞洲遊戲．光影十年」集體回憶展覽區，展出多部具代表性的「古董」遊戲機，好似90年代的NEO GEO、PC Engine、Mega Drive等等，機齡閒閒地10年以上，無論你是70後、80後抑或90後，都記得入嚟睇吓呢啲陪伴大家成長的電玩產物！

其他焦點項目

Cosplay係亞洲遊戲展一大強項，「動漫達人秀」將會在12月24日下午5時至7時30分開騷。

今屆亦唔少得有亞洲遊戲展小姐選舉，幾位候選Miss AGS將會在明日下午2時至4時進行拉票，而總決賽將會在12月26日（星期一）下午舉行，想影靚女記住準時入場喇！