Chat Room

Rowena（家庭版記者）

「點解咁臭o架？！」攝影同事F一臉無奈咁問。

早排去咗間外籍人士開設的家品店採訪，正當揀貨之際，咁啱有一個外籍家庭光顧。突然一陣怪風擦身而過；佢哋嘅5歲小孩當咗舖頭係遊樂場，踩住單車周圍走；而佢3歲嘅囡囡，就當舖頭嘅精品好似聖誕物咁逐一拆開。此時更突然傳嚟一陣異味！同事F不停咁問我「咁臭嘅？」我哋拎頭一望，嘩！原來那位媽媽竟然有洗手間唔入，就地响店內一角幫B女換片，搞到舖頭臭氣熏天，變成公廁一樣！做咗記者好幾年，都係第一次見到咁爆嘅場面。事件除咗令我睇到母愛嘅偉大，更話我知一個人嘅質素係唔可以用種族同國籍而定。The city is dying, really?

Jackie（家庭版記者）

是咁的，上周日氣溫只得10℃，但到大東山爛頭營（又名陳奕迅山，因為去年其EP封面曾於山上取景，因而得名）遠足的人更多，個個好似排隊上山咁，哈！年近歲晚真不吉利。當日重點不在於浩瀚山景及分布山野的小石屋，而是女孩子們在石屋蘆葦間影沙龍，喂！大東山假假哋都海拔800米高，我在旁邊「扯蝦」中，她們卻短裙Leggings加長Boots擺Pose，加上其兩呎厚假眼睫毛依然牢固於眼皮上，由衷畀個「服」字佢哋囉！

Lum（家庭版記者）

聖誕節未到，農曆新年氣氛已到！說的是這個放滿鮑魚、海蝦、冬菇等「參茸海味」的忌廉蛋糕。早兩日在沙田閒逛時，正苦惱買甚麼甜品回家細嘗之際，就給我在蛋糕櫃中發現其蹤影，它不單止擁有「名貴食材」，蛋糕邊緣更布滿了多塊印有「福」字的朱古力片，配以紅絲帶作點綴，散發濃郁的喜慶氣氛。試問我又豈能抗拒它的迷人魅力？所以我二話不說買下它，不過最令我意想不到的是，成堆「名貴食材」原來是各式味道的朱古力所製造，口感一流，實行集美觀與可口於一身，Yummy！