率先試玩 AGS PS Vita冧女遊戲

12月23日既是今屆亞洲遊戲展（AGS）開幕日，亦係PS Vita的香港首賣日，機迷們應該都已準備好彈藥入場買機，不過據悉貨源並唔係太多，要搶就要預早行動！就算搶唔到PS Vita，機迷都可以入場率先玩到PS Vita遊戲，目前已確定有25款PS Vita遊戲在AGS內供試玩及示範，除了之前曝光過的《Uncharted: Golden Abyss》、《Ultimate Marvel vs. Capcom 3》外，今輪就率先介紹幾款口味唔太重、啱女生及一般Casual Gamer的AGS出展的PSV遊戲！

《塊魂No Vita》輕觸變形

若果在AGS現場購買PS Vita主機，一定要跟機買埋兩款PS Vita遊戲，就算購買《Uncharted: Golden Abyss》、《Ultimate Marvel vs. Capcom 3》或《真．三國無雙NEXT》遊戲同綑版都好，都要多買一套遊戲，計我話，揀番隻Casual Game就啱喇。《塊魂》系列唔使多作介紹，在限定時間內將雜物球「轆」到有咁大得咁大，達到關卡所要求的直徑條件即可過關；而PSV遊戲《塊魂No Vita》除遊戲畫面解像度提高外，仲可以對應PS Vita的輕觸功能，利用機背的輕觸感應器來改變雜物球形狀，向橫掃就可拉闊雜物球，有利一次過吸附更多物件，而向上掃拉直後就易於通過狹窄的通道，實玩試過，操控都幾容易！

手指捽MJ

《Michael Jackson The Experience》之前都出過唔少平台版本，這個新PSV版就可應用到輕觸式玩法，按Timing跟着圍在MJ身邊半圓形指示，在畫面上捽出對應動作，玩法都頗具挑戰性！相比去年的PSP版，畫面表現精細好多，MJ更活靈活現，更有足本MV欣賞，中場Showtime時間更可以Freestyle自創舞步，愛MJ愛音樂的，都值得買來玩！至於另一套蒐集大量迷你遊戲的《Little Deviants》就可用盡PS Vita的六軸感應、機背輕觸式設計，可以篤出高山或者傾斜平台，引領Little Deviants到達適當位置，故事性雖然唔太強，主要以Fun為主，但搭車消磨時間確實唔錯。

PS3新作亦有睇頭

PS Vita雖是主菜，但都要有PS3遊戲支持，而今年在AGS展出的PS3遊戲都幾有睇頭，當中可數《無雙Orochi 2》、《Starhawk》同《Ninja Gaiden 3》。《無雙Orochi 2》結合《真．三國無雙》、《戰國無雙》、中日神話同Tecmo遊戲角色（龍隼、Ayane）的無雙式亂劈遊戲，收錄武將多達120人，試玩版中就要追打識翻生再翻生的孫悟空，甚難搞。PS3獨佔的《Starhawk》就在原有射擊遊戲系統上加入類似RTS的策略設計，攻入一個據點時要搞基建，玩落都幾有趣。至於預定明年三月面世的《Ninja Gaiden 3》，就繼續大賣暴力美學，今集唔再斷手斷腳，而係大特寫斷骨動作，斷骨後仲要在地下爬行等人殺，極盡殘忍！