Epson ME Office 570W細機身印得Free

打印機跟手機或數碼相機大不同，唔會換機換得咁頻密，甚至未必會購買；但到趕急需要列印時，都希望有部看門口。所以最好就揀部功能齊全、機身平、打印成本低、細細部唔阻地方，甚至可放在家中角落，用手機都可無線遙控打印的機款。新推出的Epson ME Office 570W的機身體積屬同級最細，而且打印每頁可以低至$0.23，一分鐘更印到33頁咁多，基本符合上述條件！

比同級對手細18%

現時主流的多功能打印機，多數體積過大，令人卻步；但當Notebook都開始過渡到輕巧主導的UltraBook年代，多功能打印機一樣都要瘦身。像Office 570W，體積縮減到只有390×300×145mm，平面面積跟潮流雜誌《FLASH on》相差無幾，但最突出是機身較矮，觀感上無咁大舊，實則體積更比同級對手細18%，擺位自然方便不少。至於操作方面，Office 570W支援Wi-Fi無線網絡，可在使用同一Access Point下連接電腦打印，甚至在手機或Tablet上安裝《Epson iPrint》App無線打印，由打印手機內的相片到網頁都甚方便，iOS或Android都用得着。

成本低至$0.23一頁

低價打印機愈印愈快是不爭的事實，但都預計唔到Office 570W黑白文件打印速度可達到每分鐘33頁。雖然在辦公室內先多機會打印大量文件、凸顯高速的好處，但在家中印咩都好，始終快手總好過慢吞吞。家用方面當然唔少得印相，以4R有邊相片為例，最快35秒就搞掂。當然，如要無邊或更高質素，就要多少少時間。另外印相或印文件的成本都唔算貴，Office 570W用上黑、靛藍、洋紅及黃色DURABrite Ultra獨立墨盒，除可用盡墨水先進行更換，而黑白文件或彩色文件打印成本更低至$0.23或$0.62一頁，雖然4R相片打印成本無確實數據參考，但同去沖晒舖印數碼相差不多。

1.44吋顯示屏操作簡單

Office 570W機價都定得相當親民，但規格亦中規中矩，掃描解像度都1,200×2,400dpi，而且掃描軟件更附設唔少實用功能，如將掃描文件文字轉化為可編輯文書檔案，或掃描成PDF檔案等。操作時只需要在機面上的控制台篤幾下就可以，插卡揀相打印都一樣可以用得着。不過要彈吓機身的1.44吋彩色顯示屏，的確有啲細，比旁邊的方向鍵更細，但好在顯示資料時都算清清楚楚。

SPEC

打印解像度： 5,760×1,440 Optimized dpi

掃描解像度： 1,200×2,400dpi

打　印　速　度： 33ppm（黑白）、15ppm（彩色）、35秒（4R）

體 積： 390×330×145mm

查 詢： 2827 8711

同場加映：Epson PictureMate PM235加框周圍印

Epson同期都出埋另一款升級版相片打印機PictureMate PM235，手挽造型跟配備充電池，可隨時帶住打印機周圍印相，最快34秒印到一張4R相，成本最平更只需$1.3。新機就特別加強相框設計，可以先行利用《Epson Frame Tool》軟件預先整定大量得意相框，儲落記憶卡然後想印就插卡即印，用來玩Surprise就最啱！