率先試玩　ES合金天威勇士

「有黑暗嘅地方就有光明」，仲有「你冇必要知道我係邊個」，咁經典嘅卡通對白，身為80後冇理由唔記得係出自《天威勇士》啩！主角阿龍集集講完呢啲例牌對白後，就會雙重「合身」變成紅色嘅大型機械人「功夫漢」。早幾年推出「超合金魂」版本時，香港反應超熱烈，如今港產Action Toys的ES合金功夫漢亦將於月尾發售，筆者有幸喺上架前率先試玩，發現Q版化（高約16cm）都玩到合體，而且無阻活動能力，關節靈活度仲犀利過超合金魂呢！

先由最細隻嘅阿龍講起，變成扭蛋Size後，纖幼嘅四肢頗難加入屈曲關節，不過另有曲臂組件畀你換，依然擺到自然嘅揸劍甫士。至於合體過程之中，先將阿龍嘅雙手藏於藍色嘅劍龍膊頭內，雙腳就直接套入下腹，故此劍龍嘅活動性完全來自機體本身關節，唔受合體所阻，尤其係膝位對下有拉出式雙Ball Joint關節，加上前腳掌都有Ball Joint，配合Die Cast小腿增加重量，令劍龍企得穩之餘，亦擺到多種高難度腿招。

扭腰叻過超合金魂

超合金魂功夫漢最為人詬病之處，就係為咗合體所以擰唔到腰，估唔到變細幾個碼嘅ES合金版反而做得到。其實設計好簡單，關鍵在於連接上下身之間嘅白色腰位，內藏一個環狀關節，位置相當於插入劍龍後嘅腰部，但兩者互不干涉，所以關上白色部分、鎖死環狀關節後，就可以扭到腰。而且四肢都有出色嘅可動性，可以橫向上下扭動，雙腳亦加入雙關節作前後踢腿，仲有轉動關節擺到「外八字腳」站姿。至於合金成分，功夫漢嘅背部、前胸甲、雙小腿都用咗Die Cast，相當墜手，然而最令人費解係劍龍跟功夫漢嘅背脊支架及頭蓋Ball Joint，都係主要嘅受力位，竟然只用ABS膠料製造，令人擔心經常變形嘅話，接位容易爆裂。

查詢：2390 9843（Action Toys）PRODUCTION REED 1986