火力全開豪快王

如果細個有追開特攝片，講起紅、藍、綠、黃、粉紅呢五隻顏色，自然聯想起不滅嘅戰隊系列。適逢戰隊系列誕生35周年，最新作品就係《海賊戰隊．豪快王》，Bandai就將當中嘅主角機「豪快王」（Gokaioh）製成SR超合金，可動性高之餘，仲忠實重現豪快王周身槍炮、火力全開嘅特點，睇怕戰隊粉絲唔買唔安樂！

《海賊戰隊．豪快王》作為第35隊超級戰隊，人物設計及故事都有好多新元素，好似五位戰士首次設定為外星人，而且係有史以來形象最百變嘅戰隊，事關佢哋可以變身成歷代戰隊、用埋前輩嘅特色絕招作戰。至於豪快王依然係五色合體機械人設計，但外形唔似傳統咁硬繃繃，揸雙刀動作佻脫之餘，仲識得連續打後空翻，以往嘅戰隊機械人就做唔到喇，粉絲不得不向偉大嘅CG技術大嗌萬歲。

可動性高　任扭任擺

至於SR版的豪快王，雖然個子唔算高，又冇變形、合體等招數，不過拎上手都幾有重量感，上色QC亦算合格，更抵讚係關節可動性高，膝蓋採用雙重關節，半跪以至大踏步等動作都可以輕易做到；腰位就有Ball Joint，可作360°轉動，而且腳踭又有伸縮關節，輕輕拉出就可作大幅度扭動，如果將腰位及腳位嘅關節同步拉出，身高會由143mm增加至150mm。關節多多之餘，更難得係夠實淨，企得夠穩陣，又唔易甩件，擺甫士唔使就住就住。

換件Gimmick　長追長有

雖然關節做得夠誠意，但係手腕造型卻是敗筆所在，可能為咗遷就前臂嘅大炮嘅關係，連接手腕嘅Ball Joint變成向內發展，揸刀時明顯怪怪哋。配件方面，雙刀及胸口大炮當然有齊，而且腳部及手臂前後都可以打開，插入炸彈配件，再喺胸口大炮加埋炮火特效組件，就可以使出火力全開必殺技「豪快．星辰風暴」。順帶一提胸口大炮採用換件設計，其實暗藏伏線，事關SR豪快王都可以跟足特攝片內容不停換裝，好似遲啲推出嘅《刑事連者》嗰部警車，就可以裝埋落豪快王身上，咁即係話入得豪快王，你都預咗要追埋之後嘅SR戰隊系列，想唔買窮都難。