Chat Room
家庭版 記者：Wendy
凡事總有第一次，遺失銀包也不例外。話說有個晚上，快將9時，翻箱倒籠也找不到銀包。記得當日在樂富廣場完成萬聖節活動採訪，便在場內的餐廳吃Lunch，其後再沒有到其他地方消費，所以肯定餐廳是案發現場。於是，先致電報失信用卡，然後再致電餐廳，慶幸世上還有路不拾遺的人！銀包內有數百元、身份證、信用卡、藥物敏感卡、觀音玉吊墜等，當時我想現金沒有了，就當做善事吧！最麻煩要補領身份證，以及遺失了觀音玉吊墜，那是幾年前因我患癌，媽咪送給我傍身的，幸好現在一切也回來了！
家庭版 記者：Rowena
連續兩個星期日去遠足，第一個星期行行吓，「嘩！我隻右腳波鞋鞋頭爆咗！」未落山，鞋底已經成隻甩咗出嚟。同行朋友冇乜反應，事關去年秋季，同樣的事情都發生過。第二個星期日再去行山，今次我醒咗，仲大大聲聲話：「好彩冇着上次對波鞋，着咗對行山鞋，唔係就大件事囉！」正當懷着興奮嘅心情落山時，朋友突然問：「你係咪又甩咗鞋底？」我堅定地答：「冇！」佢彎身執起一隻鞋底畀我睇，我望望隻右腳……今次嘅笑聲比去年更響亮，落到山腳，連隻左腳鞋底都宣告死亡。但環保嘅我係唔會咁易畀佢哋死！我要令佢哋「還陽」，於是執咗番屋企黐番好對鞋底，Yes！
家庭版 記者：Ivy
有次，想打電話給PR時發現對方也叫Ivy，頓時感覺大為尷尬，你諗吓：「唔該搵Ivy呀，我係太陽報副刊Ivy呀！」多麼可怕。不過工作接觸這麼多PR，遇見叫Ivy的只有一兩個，心想：是不是因為大家都不喜歡Ivy的諧音是「矮肥」，所以都避開這個名字呢？記得這個名是小二時被英文老師改的，當時比現在更矮肥，現在也很矮肥，所以名字就沿用至今……
很多謝身邊朋友常常為我留意「矮肥」牌物件，謝謝各位！