難逃一劫 超級地隱俠蒲頭

「魔動槍發射！」、「大地鼓動，出嚟啦大地神劍！」繼《魔神英雄傳》後，相信唔少80後、90後，一定記得動畫《魔動王》嘅變身畫面，以及上述嘅招牌對白，即使只係短短幾十秒，都足以令當年作為塞豆窿嘅你我他連廁所都忍住唔去，要睇足全程先安樂。如今MegaHouse推出幾乎完全變形嘅超級地隱俠，珍珠白配電鍍紅「令立立」，搶眼程度蓋過之前嘅「壽屋」版本，又再打集體回憶呢招向玩具迷搶錢。

《魔動王》最深入民心嘅設計，就係由神像頭雕變成機械人，出位之餘，變形過程又簡潔利落，唔只粉絲容易睇得清，玩具廠設計商品時都分外易Handle。MegaHouse嘅超級地隱俠就喺雕功及上色都拿捏精準，電鍍紅及珍珠白作主色，襯埋寶藍色心口及雙肩，分外華麗。而且整個變形構造都相當簡單，只需順序拆下背部頭冠，將雙腳屈上背部，拉高上胸，同時將雙腕向內屈，最後將頭冠遮埋頭部就完成。不過要彈嘅係腳背榫位較難緊插背部，而且腕甲連接肩甲時又冇榫位加固，變成頭像後略帶鬆散。

全膠宴唔受力

其實《魔動王》嘅機設大多又矮又肥，變成玩具後，關節可動性難免打咗折扣，尤其是笨重嘅肩甲及腕甲就最阻頭阻勢。好在超級地隱俠嘅膊頭用咗Ball Joint連接，令雙肩可作些少幅度前後延展，擺到自然嘅拔劍甫士，腳踭亦有拉出式關節，有助腳掌大幅度伸展。可惜整個超級地隱俠都以ABS膠料製成，就連最受力嘅腳掌，都冇改用Die-cast加強接地性，唔係每個甫士都企得穩。此外，雖然大地神劍嘅劍柄跟足原著，可以向外伸展切合出招甫士，但邊玩邊甩件嘅情況相當嚴重，賣成$600過外嘅玩具，咁嘅質素似乎有啲講唔過去喎！

查詢：2148 9483（精品）