撐格蘭披治賽車Apps陪跑

一年一度的澳門格蘭披治大賽車又再度重臨濠江，焦點當然是星期日舉行的東望洋大賽跟三級方程式大賽，睇住各車手點樣用盡計仔過髮夾彎都確係享受。車迷們年年都睇電視直播，今年又有冇諗過親身過大海感受現場氣氛？拎埋部下載咗官方App的iPhone就可起行！

《58th Macau Grand Prix》扮賽車攝影師

今年大會推出官方iOS App，等大家可得知賽程、門票價格等資料，想追睇三級方程式大賽、澳門東望洋大賽到格蘭披治電單車大賽都唔怕走雞。App內還提供Grand Prix Moments小遊戲，讓大家化身賽車攝影師，在三項模擬賽事中拍低最精彩一刻跟朋友分享，唔使帶小白都影到賽車相。

下載費用：免費

《Supercar Bible》聽超跑引擎聲

認識不少愛車之人，聽到愛車引擎發動就十分亢奮，這個名為《Supercar Bible》的App就實屬愛車人士必下載之列。App內收錄37架超級跑車資料，詳盡規格資訊全部有齊，例如想Check下Koenigsegg架超跑Agera R最高時速有幾快都眨眼間搵得到，更特別係收錄的名車引擎聲，雖然唔係部部都有，但據說資料庫會不斷Update呢！

下載費用：US$0.99

《F1 2011 Timing App》即時追蹤賽道表現

今屆一級方程式冠軍車手維特爾已經無法打破車神舒密加一季贏最多分站冠軍紀錄，但仲有機會打破文素最多排頭位出賽紀錄，透過《F1 2011 Timing App》就可以即時追蹤佢在最後一站排位賽及比賽表現，但係要另外付錢先有以上服務。除時間資訊外，仲可以3D地圖即時追蹤每位車手在賽道上的位置，亦可以揀選心水車手全程追蹤。

下載費用：免費

《Grand Prix Story》Lo Tech冠軍車隊

相對其他iOS Apps，《Grand Prix Story》難免顯得有點Lo Tech，不過Lo Tech正是開發公司Kairosoft的特色，但耐玩性跟趣味性都贏盡口碑，在App Store上屢獲五粒星評價。《Grand Prix Story》要你在15年內經營一支方程式賽車車隊，由寂寂無名而成為首屈一指冠軍車隊，一玩就停唔到手，現時特價，真係好值得Download嚟玩。

下載費用：US$3.99（現特價US$0.99）

《F1 Drivers 2011》車手比賽心迹

相信車迷都應會關心車手的一舉一動，《F1 Drivers 2011》主力報道廿多位F1車手的消息，不過，想得知每位今屆F1車手的故事，圖文並茂地睇車手如何扭轉形勢到最後高舉獎盃，就要逐個逐個車手畀錢買！可幸心儀車手應該都係得幾位，又唔會太破費嘅！

下載費用：免費

《Race of Champions-Official Game》一對一淘汰賽

iPhone上賽車遊戲選擇多不勝數，但真正係賽車界官方出品就唔多，如Formula One的版本都只係出到2010年。想轉轉口味，可嘗試同樣為官方遊戲的《Race of Champions》。跟方程式賽車規例唔同，《ROC》係玩一對一Head to Head淘汰制比賽，總之在賽道上贏到對手就可晉級，遊戲仲提供體感式、點選以及虛擬軚盤式操控，想點玩都得，畫面表現更相當抵讚。

下載費用：US$4.99