on.cc 東方互動主頁

Assassin's Creed Revelations刺客臨老學新招

由09年的《Assassin's Creed II》開始，到10年的《Brotherhood》至新推出的《Revelations》，主角Ezio嘅「刺客三部曲」終於到了最終回，今次有咩好玩新元素都一次過加晒入遊戲之內，除了非常實用的新武器鈎刃（Hookblade）外，亦加入DIY土製炸彈來炸人及引開對手，甚至可Call埋「兄弟會」手足幫手擺陣！就連上集有玩家嫌較單調的連線玩法也大幅改進，即使未玩過前兩集，都值得高追這套大作！

重溫大師之路

未講新Game之前，首先講吓《Assassin's Creed》系列的歷史。第一集《Assassin's Creed》係以傳奇刺客Altair做主角，到《Assassin's Creed II》後先轉成Ezio，但原來Ezio同Altair係有關連，今集就揭盅話Ezio喺不由自主的情況下跟隨當年Altair的步伐，回到刺客大本營敍利亞Masyaf尋找五條關係到刺客兄弟會未來的鎖匙，從中體驗Altair當年的生活及回顧他的記憶，所以在適當時候，穿白色刺客行裝的Altair都會出場。而今集故事背景就發生在文藝復興時期的鄂圖曼帝國君士坦丁堡，城市場景比得上之前的佛羅倫斯、威尼斯等意大利城市，但歲月催人老，今集Ezio容貌已呈老態，但好在身手仍然了得，而且臨老仲學得新技能添！

溝料整炸彈

製作炸彈係今集新技能，但大家不要以為炸彈只係用來炸死敵人，只要使用唔同配方，就可以製造出不同威力的炸彈。要製造炸彈離唔開三樣材料，包括特定外殼、火藥跟主導炸彈功用的成分，各種元素都可以在冒險過程中取得，例如用上炮彈碎片就可製作出碎片炸彈，功能跟現代手榴彈接近；另外亦可以製作出能產生巨大聲響的小型炸彈引開敵人，至於怎樣調配配方，就要視乎場合。Ezio今次亦修煉成更強的鷹眼系統，名為鷹眼觀感Eagle Sense，睇得見人物同事物所產生的微弱光芒外，今次仲勁到可以追蹤到目標物的移動路徑，要完成暗殺任務就更容易。

新武器夠實際

另一樣新元素，就是Ezio可用上能收在袖口的Hookblade鈎刃，既可攻擊，又可作輔助用途。最簡單用法當然係直接刺殺敵人啦。另外在城牆間跳躍時可幫助主角攀到更高位置，又可以面對面衝向途人用鈎刃借力翻身逃走，不過記住翻身後要鬆掣，唔係就會殺了途人，惹來更多人追捕。鈎刃另一特別用途係可以鈎住城市樓房間的滑索，滑行到特定位置或者從天而降刺殺目標，但時間性方面就需要慢慢掌握。

今集加入了馬車追逐戰關卡，從地面被馬車拖行避開障礙物，到馬車互撞要捱到過關都幾有難度，筆者都要玩幾次先能夠完成。至於連線模式方面就落重料，在《Brotherhood》時有玩家覺得連線模式較少，而且似追殺多過暗殺，今集就加多四個包括Deathmatch、如搶旗仔的Artifact Assault及類似Infection的Corruption玩法等，而且更着重大家的刺殺技巧，以動作遊戲嚟講，有咁多種連線玩法實在少見。