on.cc 東方互動主頁

《Need for Speed : The Run》三千哩大暴走

近年《Need for Speed》都出得幾密，而且每集風格都唔同。無他嘅，因為背後有幾個小組為《Need for Speed》開發新版本，好似今次為新一集《Need for Speed : The Run》操刀嘅係之前出過《Undercover》的EA Black Box，同較近期推出的《Shift》系列和《Hot Pursuit》系列並非同一祖宗。不過今集《The Run》就做出多個系列上的「第一」，如收錄天下第一長賽道，第一次加入動作成分，亦係第一個用上Frostbite 2 Engine的非射擊遊戲，夠晒有睇頭！

首用真地名鬥快到紐約

由於今集係由主理《Need for Speed: Undercover》的開發小組出品，因此會承接玩臥底這條脈絡，令今集《The Run》的故事性方面都幾強，唔係只得兵追賊、賊仔走佬等老套橋段。主角Jack Rourke今次得罪晒黑白兩道，主因係爭落犯罪組織一大批錢，另外又因為本身係通緝犯而被警察追捕，要保得住條命仔，就半推半就下參加獎金達2,500萬美元的大賽車，由西岸三藩市出發，途經拉斯維加斯、丹佛、底特律，鬥到去紐約市，在無規則限制下，有命而且第一個抵達紐約就可完成任務。大家可能唔知，原來今次係18代《NFS》系列中，第一次在遊戲上用真正地名呢！

首用新遊戲引擎畫面超靚

由西岸揸車去東岸，路程有3,000哩咁長，不過遊戲就唔係所有地段都落晒，只係揀選當中地貌最有代表性的來設計成賽道，當中有雪山、峽谷、公路甚至是城市景觀，賽道的真實長度超過300公里，屬收錄最長賽道的賽車遊戲，比《Hot Pursuit》長三倍。

遊戲引擎方面，《Battlefield 3》的Frostbite 2有幾堅，玩家們應該都有目共睹，但原來《The Run》亦用上這個新遊戲引擎，並且係第一個非射擊遊戲採用，無論在場景細節、賽車的反光位以至賽車的物理性都變得更真實，配合極具速度感的賽車場面，真係靚到目不暇給。

首增動作成分真人演出

遊戲另一個「第一」，係首度在《Need for Speed》遊戲中加入動作成分，不過所佔的篇幅並唔算多，只是開場時及遊戲中段時用作交代劇情。動作部分玩法多數係要在短時間內按下畫面上所出現的按鈕，或者要推手掣上的搖桿推門掙脫等，一唔小心失手的話，就可能會束手就擒或者死亡Game Over，純賽車玩家就要練習一下喇！另一樣抵讚，係今集遊戲好認真地搵來幾位美國藝人擔當主要角色，如由Sean Faris扮主角Jack，Christina Hendricks做助手Sam，仲有兩位《體育畫報》水着模登場；香港玩家識唔識得佢哋都唔緊要，最緊要係一路鬥車一路可以升級靚車，遊戲內收錄了2012年款Porsche 911 Carrera S、700匹馬力的Lamborghini Aventador、Chevrolet Camaro ZL1以及「風神」Pagani Huayra，走佬都走得豪過人。