鋁摺達人Orson Li：成功冇得Download!

柴九名句：「人生有幾多個10年？」其實哪怕你有10個10年，如果每個10年，你都渾渾噩噩地過，畀多幾個你都無意思吧？

憑一雙手摺出鋁罐機械人Canbot而闖出名堂的Orson Li（李浩迅），翻開他過去10年的Portfolio，絕不渾噩，仲幾出其不意添！做過核數師、模特兒及廣告公司老闆，最新銜頭是「鋁摺達人」。通常瓣數多，只有兩個可能，一是唔知自己想點，左搖右擺；二是你的確瓣瓣掂，成功達標後追求更多挑戰。Orson自然是後者，他做過本地Top 10 Model，又是「摺界」紅人，10年多啲啲，現在已經半退休狀態，妒忌他嗎？但他說：「成功從來冇得Download！」

講到執汽水罐的動員能力，無人及得上深水埗啲婆婆，但能夠像Orson般，想到用摺紙技術來摺汽水罐，令一個高3.5cm的Canbot一舉成名，紅到去外國，成為「達人」級之餘，仲摺到選傑青，入選最後20強，就真係估佢唔到！

摺到選傑青

「其實我係Last Day才報名（選傑青），第一次Interview嗰日，把聲沙到好似曾志偉咁，仲要遇上黃雨，去到嗰陣成身濕晒，連啲Canbot都濕埋，有諗過唔去，但又覺得做人唔應該放棄，最終沙住聲講咗個半鐘，好開心入咗20強。第二次Interview嗰日又咁啱我姑婆出殯，朝早去完火葬場，成個人好，又諗過唔去，但Canbot就係鼓勵人唔好放棄，追求自己嘅理想。雖然最終冇入選，但能夠向馬時亨、沈祖堯等評判Present Canbot的意義，我覺得已經賺咗！」由最初將廢棄的汽水罐變成潮物Canbot，到今天Canbot「I Can Make It」的精神反過來鼓勵了他，有趣又浪漫的風雨同路！

廁所Slogan大啟發

成功背後總有一個感人故事，但Orson的故事卻像典型電視劇情節——出身中產家庭，名校畢業，本來順理成章進身商界，最終卻想走不一樣的路，「美國大學要讀4年，我同爸爸媽媽講好，如果可以用3年完成學位，就畀1年時間我做Model，結果我真係完成，仲日日做Gym、游水，操Fit自己。點知畢業回港時，興起日本瘦身男Model，結果次次Casting都失望而回。」Orson說，當時同期的Model還有拍《Y2K》的余文樂，的確是瘦削日式男孩。

Orson疊埋心水做核數師，考進「四大」會計師樓，點知咁都黑仔過人，同期畢業的朋友被派到尖沙咀工作，他卻被派往元朗工業邨，「每日由愉景灣山長水遠入去元朗返工，仲係典型日本公司，好刻板，真係好沮喪；但有次無意中喺廁所見到一句Slogan：『未完成的事，就要全力去做，做到成功為止』，有少少影響咗我，加上當時公司準備調我返內地，令我決定辭職，再做Model。」

為理想跌入板間房

這位UCLA經濟系畢業生，人生中至少有兩次畀人話佢「黐咗線」，包括有核數師唔做，走去做搵朝唔得晏的模特兒，令他人生極速「變天」，父母把他逐出家門，一夜之間由愉景灣靚樓降格到銅鑼灣「劏房」，睡床隔籬就是廁所，折墮？還未算，幾天後再被女朋友速撇，「我同自己講，一定要發奮，結果當我接到第一個Job，收到$8,000嗰陣，我用咗$7,000買咗部DV，就係要每日練Casting，練到最純熟為止，咁啱嗰時又興番歐洲高大男模，結果每次Casting都百發百中！」

3年的模特兒生涯，Orson行過無數大Show，2002年時，更從300多位男模中脫穎而出，成為首位登上《君子雜誌》封面的亞洲男模，全街都有他的廣告，奠定本地Top 10 Model的地位。不過，很快他又轉而開模特兒公司做老闆。「傑青評審馬時亨也質疑我，會否覺得自己搖擺不定？但現在我認為每個範疇都是做到成功，我才跳出去，好像我已成為Top Model，才轉做幕後訓練模特兒；之後更轉型兼做廣告及設計公司，上了軌道後，我才發展兒時的摺紙興趣。每步看似偏離好遠，但其實每一小步都係重要的踏腳石，幸福與成功都唔係必然o架！」與其說他搖擺不定，不如說他眼光夠遠大，看到跟他同期出道的蕭正楠，還在公仔箱打滾，Orson現在已經半退休喇喎！

點罐成金

「一個汽水罐可以改變世界！」是Canbot的口號，Orson亦努力實現這個夢想，從商業角度而言，一個汽水罐可摺5個Canbot，以日本幪面超人汽水罐版Canbot每個值$6,000計算，一個價值6毫的汽水罐，至少可賺到$30,000，升值5萬倍。你有你唔抵得，他有他遍及美日韓的支持者，連法國、以色列都有，但他人生第二次被人話「黐咗線」，正是決定發展Canbot事業，「最初好自豪咁拎Canbot畀朋友睇，佢哋話我傻，一定失敗；但依家同朋友食飯，佢哋話想親手掂吓Canbot，連阿媽啲朋友都問我買Canbot有冇折頭！」

其實他最初摺鋁罐只為興趣，但最意想不到的是，自己的經歷感染身邊的人，「有啲年輕設計師，覺得一個汽水罐可以賣到咁多錢，佢哋都想學我；又有年長的設計師，睇到Canbot之後，知道我提倡『Upcycled』，感染到佢哋想做一啲事回饋社會，我仲知道有做醫生嘅朋友，因而追尋自己做廚師嘅夢想……我真係好開心，但我想講，呢個世界冇懷才不遇，只有你做得未夠好，亦唔好單睇人哋嘅成功，更要睇成功前做過啲咩，我成日同人講：『成功冇得Download』，一定要付出時間！」

卡通人物延續精神

Orson從不授徒，每個Canbot都是他親手摺，更因為日摺夜摺令身體出現勞損，晚上試過痛到扎醒，醫生建議每天只可摺罐6小時，所以由以前一日摺一個，現在要1星期才行，較複雜的款式則更要1個月才能完成。長此下去，Canbot會否絕迹？「我相信Canbot是我的終身目標，我最希望能以一個汽水罐來改變世界，所以近年我將它設計成卡通人物，創作了『小樂』（Rockie）這個角色，透過網站漫畫講解環保故事，即使有一天沒有了Canbot，它的精神也會延續下去。」很多人會問Orson：「你究竟是生意人還是藝術家？」他會答你：「我兩樣都係，因為人生要多方面發展，先至會成功！」

後記：不做羊群 但Out Fo！

Canbot的意義在於其獨特性，因每個Canbot都是手摺，獨一無二。眼看社會人人都「埃瘋」，Orson有感而發，「講到明話（訊號）收得唔好，啲人都仲係排隊買，點解？因為羊群心理，覺得咁先有安全感，我講『Upcycled』就係想大家唔好人云亦云，要自己思考！」Orson絕非得個講字，佢用嘅手機都係幾年前嘅Mo記，小記當下覺得佢好型，但當請他用手機幫Canbot影張相，搞一大輪都係Out Fo時，他笑着解釋：「我呢部已經係高清鏡頭o架喇！」念在跟他都是力拒「埃瘋」的「Mo記之友」，就放他一馬！

Profile

李浩迅（Orson）

典型中產家庭出身，美國加州大學洛杉磯分校UCLA經濟系畢業，1999年畢業後回港考進「四大」會計師樓擔任核數師。一年半後投身模特兒行列，成為本地Top 10 男模；2005年開設模特兒兼廣告設計公司，並開始把摺鋁罐機械人由興趣變成生意，被稱為「鋁摺達人」，實踐「I can make it」的人生態度。