Michael Lau Galaxy Note親試意想筆到
靈感隨時到，創意工作者雖然有好多方法記低佢，但手機屏幕太細，Tablet又嫌太大部，最後還是用紙筆書寫最快捷。然而，本地Figure設計大師Michael Lau最近卻放棄紙筆墨硯，因為手持的Samsung Galaxy Note更方便，不但5.3吋芒尺寸剛剛好，跟機的「S Pen」仲可以用來寫字兼畫公仔，佢話︰「我最鍾意佢有埋壓力感應，線條粗幼隨意控制，我終於可周街畫CrazyMichael了！」
Samsung並非首趟推出五吋產品，今年年中就出過部Galaxy S Wi-Fi 5.0，不過呢部機插唔到SIM卡，要打電話就要帶多部手機出街，真係搵嚟搞！相反今次Galaxy Note就加入電話功能兼可畫圖記事，既是手機又是Tablet，可謂流動Gadget的新形態。
同步記低筆觸
叫得做「Note」，主要功能當然離唔開記事。機底附有一支「S Pen」，外形跟常見的Stylus筆近似，只要配合內置工具「S Memo」，便可在屏幕Jot Notes、畫公仔或寫電子便條，而且筆頭有不同粗幼和顏色選擇，直頭小畫家一樣。Michael Lau即席示範，基本上每一下筆觸都能同步記錄，屏幕又能感應到落筆輕重，同用畫紙畫冇咩分別。另一方便之處是Cap圖，只要用筆尖壓實屏幕兩秒左右，就能擷取當前畫面，之後可裁走多餘部分或任意「鬼畫符」，剪剪貼貼勁好玩。
大量專屬Apps
「S Memo」以外，機內還有不少地方可讓大家即席揮毫，例如Polaris Office除可閱讀及修改doc、ppt等檔案，還容許「S Pen」在文件上寫入註解，之後再當作圖片般發送，比打字方便得多。另外，「S Planner」是強化版行事曆，既支援放大縮細，又能直接匯入「S Memo」內的圖像或文字，傳統記事簿邊有得比！若嫌預載Apps唔夠玩，Samsung Apps商店還新增了一個「S Choice」專頁，內裏全部Apps都為「S Pen」而設，當中《Virtual Nail Salon》就畀大家盡情美甲，女士必Buy！
特大電池夠用一天
說回機身設計，Note屏幕足有5.3之巨，比4.3吋芒的Galaxy S II還要大一個碼，加上HD Super AMOLED面板加持，畫面清晰到爆；部分工具如SMS更可以分割畫面顯示，好比迷你電腦一樣。凡事有辣有唔辣，雖然機身厚度僅有9.65mm，但178g重就唔算輕巧，單手拎就頗為墜手。至於內涵，1.4GHz雙核心處理器、HSPA+ 21Mbps、藍芽3.0都是目前最頂級規格，最正是電池足有2,500mAH咁大，講埋電話都夠玩成日，唔怕畫公仔畫到冇晒電！
SPEC
制式︰GSM四頻、WCDMA
作業系統︰Android 2.3
處理器︰1.4GHz雙核心
屏幕︰5.3吋1,670萬色HD Super AMOLED（1,280×800解像度）
鏡頭︰800萬像素（後置）200萬像素（前置）
記憶體︰內置16GB，支援最高32GB microSD
對外連接︰藍芽3.0、USB 2.0、21Mbps HSDPA、802.11n
通話時間︰26小時（2G）、13.5小時（3G）
備用時間︰960小時（2G）、820小時（3G）
體積︰146.85×82.95×9.65mm
重量：178g
查詢︰3698 4698
$5,998
採用Android 2.3系統，並提供七版首頁。
Michael Lau即席畫CrazyMichael，就算畫得幾快部機都跟到，佢話同用紙筆畫冇分別喎！
Galaxy S II（右）個芒唔算細，但同Note拍埋就即時比下去。
可任意調校「S Memo」的筆頭形式、粗幼及顏色。
篤一下芒就能Cap低當前畫面，地圖加文字，最啱約會用。
「S Planner」可匯入「S Memo」的文字及圖案，篤一篤日期就睇得番。
《Virtual Nail Salon》是美甲App，女士可自行畫樣辦，再畀美甲師參考。
相片可直接掟上Facebook、Picasa等社交網，甚至可經Whatsapp傳送出去。
屏幕夠晒大，讓部分工具如SMS便能以分割畫面顯示。
對應Flash，睇到ontv新聞短片。
「S Pen」可收納於機底，冇咁易遺失。
要拆電先換到SIM卡同記憶卡，唔夠方便！
機身僅厚9.65mm，同支原子筆差唔多。
機背有防跣手格仔花紋，頂部則係8MP鏡頭連LED閃光燈。
同步推出的還有座枱充電器及車叉。