Rabbids ALIVE & KICKING 畀賤兔玩殘
趁還是兔年，「賤兔」今年決定搞多一次破壞！繼年初Wii版《Rabbids : Travel in Time》後，「賤兔」喺年底首度現身Kinect體感平台，仲用埋AR技術，從多方位、多角度惡搞大家。這次Kinect新作《Rabbids : Alive & Kicking》中，玩家要用盡全身氣力去應付衰衰格格又多鬼主意的「賤兔」，好玩又抵死，少啲精力都搞佢哋唔掂！
首度對應Kinect操控
玩《Rabbids》這類以惡搞為主的Mini Games，都係以體感方法最直接，而且遊戲由Wii的體感手掣過渡到今次《Rabbids: Alive & Kicking》的Kinect全體感操控，唔止要手郁、腳郁，就連全身都要郁，要左閃右避，擒高擒低兼捐窿捐罅。今集遊戲故事性設定唔似上次《Travel in Time》深入博物館咁講究，但好玩體感Mini Games就加倍奉上！先來個熱身，玩體感版「踩」傻瓜「Whack a Rabbid」，這遊戲地面會有九個圓圈，樣衰衰嘅賤兔會不時在唔同圓圈伸出頭來，玩家要好似玩扑傻瓜一樣，起勢踩落去。不過大家唔好以為斯斯文文作勢輕力踩佢個頭就得，實玩時真係要出盡力跳起狂踩先可以踩爆賤兔，認真玩到索晒氣。
約埋朋友擺甫士
唔想太出力嘅話，可玩「Body Building」淨擺「甫士」。所謂「Body Building」就係要跟番畫面的健美先生擺姿態，但並非全屬谷肌肉姿勢，連扮踢腿動作都有，真係唔易！最慘係遊戲會自動幫你影相，等你畀人笑餐懵。唔同遊戲可支援不同數目玩家，一人、二人、甚至四人都有，如「Body Building」只屬一個或兩個人一齊鬥大隻，但「Shape」就一個玩家絕對玩唔掂。「Shape」係一個扮各種物件造型的迷你遊戲，玩法接近大家熟悉的《大咕窿》，愈多人玩愈易扮得似物件的剪影，如果只得一個人真係唔知點樣扮得到成架宇宙飛船咯！
惡趣味舔賤兔
另一個挑戰大家能耐的迷你遊戲係「Not Seen, Not Caught」，主題講要避開窗外探射燈的照射，開始時還好好哋，只要睇得出射燈的移動軌迹，匿喺暗處就唔會被人發現，但後來射燈會無定向喪心病狂般亂掃，跳起、趴地係唯一辦法，愈玩愈High。
至於「正常」的迷你遊戲都有大把，如你企在兩列火車中央，要不斷兜巴星掌摑兩旁從火車伸出頭嘢嘅賤兔，手腳並用跳高先打到。而貫徹遊戲的惡搞成分，另一必玩「惡趣味」迷你遊戲就係「Lick It Up」，大家要鬥快舔走賤兔面上的批，都幾核突，都唔知係人玩遊戲抑或遊戲玩人！
INFO
類 型：迷你遊戲
開 發：Ubisoft
平 台：Xbox 360 Kinect
推出日期：已推出
售 價：$299
查 詢：2418 8896
為咗慶祝《Rabbids》首次在Kinect上推出，「賤兔」出盡法寶「玩」Kinect感應器。
唔好畀「賤兔」個無奈樣呃咗，其實呢關係要玩家鬥快舔走晒「賤兔」面上的批，有啲核突。
「Shape」玩法跟《大咕窿》接近，要在限時內擺出畫面中圖案的姿勢，一個人真係玩唔到。
此Game都有啲易玩嘅迷你遊戲，如在跑步機鬥快跑步。
「Body Building」要擺出各種大隻佬姿勢，最好笑係鏡頭會Cap低你扮大隻佬的滑稽樣。
「踩賤兔」融入咗AR技術，「賤兔」好似會在地板捐出嚟。
成班人好似玩「人肉層層疊」係做緊咩？其實係「Shape」的真人示範。