《Uncharted 3: Drake's Deception》驚險玩泥沙

《Uncharted》已經成為SCE最受歡迎的自家開發動作冒險遊戲，主角以男版「羅拉」姿態環遊世界冒險尋寶，頭兩集已經遊歷太平洋孤島同西藏雪山；玩石玩雪後，第三集《Uncharted 3: Drake's Deception》就去玩沙，在阿拉伯半島沙漠上尋找有沙漠阿特蘭提斯之稱的「千柱之城」。今集在畫面表現以至動作細節上都有所強化，呈現出沙漠的形態同質感，主角更要再次使出九牛二虎之力先能夠解開謎團，唔係玩泥沙咁易！

轉戰沙漠古城

《Uncharted》系列有幾紅？連PS Vita出機時都要同步出埋隻《Uncharted: Golden Abyss》就知。紅還紅，家用版出到第三集都唔可墨守成規食老本，題材方面都要有新意。上兩集分別已經將舞台設定在太平洋孤島同西藏雪山，今趟《Uncharted 3》就將故事背景搬到中東阿拉伯半島，主角Nathan Drake會同前輩Sullivan深入阿拉伯沙漠尋找失落古城「千柱之城」。此城其實並唔係「原創」，靈感來自19世紀英國軍官在中東考古時的經歷，上網搵「Iram of the Pillars」就可獲得唔少相關資訊，據考證原來這失落之城就在現今阿曼境內。

沙海做到真嘅一樣

要處理連綿沙海的畫面並唔容易，跟製作海面效果一樣咁難，但《Uncharted 3》就能夠表現出沙海的層次及質感，如呈現出因高熱造成的扭曲影像，以及流動的沙地跟遠方的海市蜃樓，沙漠唔再係一片死實啡色。雖然遊戲主旨係要尋找失落之城，但場景不只限於沙漠，例如Drake要跟Sullivan深入着晒火隨時會倒塌的大宅中搵出路逃走。當然最得讚賞係遊戲嘅敍事方式、劇情推進到畫面分鏡，都極具電影感，有幾分似睇緊《Indiana Jones》。原來日本方面更搵來一直扮演Indiana Jones的Harrison Ford「福伯」為遊戲賣廣告添！

多個精裝版本任揀

為要應付高密度驚險動作場面，今集會加入更多元化的動作設計，如赤手空拳跟敵人搏鬥，配合周遭環境而作出攻擊，亦能配搭全新的隱藏攻擊招式，同時亦可以使用道具強化槍械等武器，提升攻擊力以解決敵人。另外值得一讚的是加入了多人玩法，唔使一個人尋寶咁自閉。《Uncharted 3》提供兩種支援多至十人的連線對打玩法，能以合作模式或多人搶奪寶物模式進行，如奪寶模式係鬥快搶奪地圖上的黃金雕像，玩法無單人模式咁驚險，但勝在簡單直接，一嚟就可埋牙鬥搶。此外，《Uncharted 3》提供大量唔同包裝及版本任揀，如SteelBook精裝版、連Figure的珍藏版同連手掣的特別版，話晒係大作，梗係要搞多啲「花臣」！

INFO

類型：動作冒險

開發：Naughty Dog

平台：PS3

推出日期：11月1日

售價：$388

查詢：2341 2356