《Batman: Arkham City》 監獄風雲

唔係人講就信，但絕大部分外國權威遊戲網都畀9.5分以上，如IGN就打出9.5分，而Game Informer更畀到10分滿分，都至少證明到《Batman: Arkham City》在各方面都有高水準表現！遊戲畫面靚絕，分鏡極重電影感，如果有埋3D電視更能睇到一如3D大電影嘅突出效果。但講到最正係今集副線任務超多，要完全玩完遊戲要用40個鐘，抵玩到飛起！

療養院化身五倍大監倉

《Batman: Arkham City》故事延續自兩年前推出嘅《Batman: Arkham Asylum》，故事主線係原來用來收容精神病患者的Arkham療養院已經遭受徹底破壞，但勢估唔到係院長Quincy Sharp竟然做咗Gotham城的新市長，在Gotham城上打造一座用高圍欄圍起，名為Arkham City的大型監獄，將原本療養院嘅精神病患者同埋其他罪犯一齊囚禁在裏面，真係入得去嘅都唔慌正常。未變身成為Batman前嘅有錢佬Bruce Wayne就因為涉足政治而想拆毀Arkham City，在記者會上被人生擒送到入這大型監倉之內，拳頭就係呢個空間上嘅法律，好在一入「監」後所遇到的都只係嘍囉，唔難應付。

大反派悉數登場搞破壞

Arkham City實屬三山五嶽之地，唔同壞人各據一方，佔領唔同山頭，所以遊戲某程度上都有啲似開放式冒險遊戲的格局，但始終因為要忠於原著，開放式空間唔會好似《GTA》咁龐大，但面積已經係《Arkham Asylum》時嘅五倍，還附上大量副線任務畀大家玩，大家都可估到謎語人會在今集出場，只講謎題就已經有超過400個咁多，唔可以限時解開謎語人嘅謎題，就唔使旨意走人。話晒Arkham City係收容所有壞人嘅地方，除謎語人之外，企鵝、小丑、雙面人、急凍人等全部都會有份出場，場面夠晒熱鬧。由主線打到去唔同副線任務，今集嘅劇情長度係前作嘅兩倍，耐玩性超高。

玩完蝙蝠俠兼玩貓女

變身蝙蝠俠後，主角所使出的道具跟招式都多咗好多選擇，在多人包抄下更易殺出血路。如果大家係用3D電視去玩嘅話，更可以睇到高質素嘅立體打鬥場面，跟《Batman》電影有得比。蝙蝠俠動作招式較硬橋硬馬，今集更可以用埋動作較優美嘅性感貓女，會用上猶如體操般招式擊退敵人，亦有自己一套在Arkham City上飛檐走壁的方法。設計小組亦特別為貓女設計出專屬任務，由最初偷取記憶資料失手被擒開始，要在主線遊戲完成特定任務先能再開啟其他關卡。甚至在挑戰模式入面，更可以控制埋羅賓，一次過滿足到Fans嘅多個願望。由登場角色、故事任務、聲畫表現到內容方面都極高質量，唯一不足之處，可能係只能自己一個人在大監倉內得個打字囉！

INFO

類　　型：動作

開　　發：Rocksteady Studios

平　　台：Xbox 360、PS3

推出日期：已推出

價　　錢：XBOX $378、PS3 $398