《Battlefield 3》 戰場真到驚

《Battlefield》定係《Call of Duty》好？對戰爭射擊遊戲迷嚟講，的確唔易揀。前兩年或者《Call of Duty》多人鍾意，但今日正式推出的《Battlefield 3》在採用次世代遊戲引擎Frostbite 2加持下，角色動作以至爆破場面都真實到嚇你一跳，建築物外牆被打碎後會好似落雨般粉碎，可說係史上最誇張；再加上《Battlefield 3》推出日期比宿敵《Call of Duty: Warfare 3》早兩星期，今次有機搶客了！

次世代遊戲引擎炸到粉碎

雖然《Battlefield》好似年年都出新版本，不過呢幾年所出的版本都唔算係2005年《Battlefield 2》的正式續集，要到這隻《Battlefield 3》先算係次世代版本。叫得做次世代版本，《Battlefield 3》用上新開發的Frostbite 2遊戲引擎，有能力應付極高要求的圖像處理效果，即使在鬧市中作大規模戰鬥，都能應付自如，無損畫面細緻度，轟炸建築物時唔再好似以前遊戲會成堵牆冧咁簡單，而係石屎會被炸至粉碎，抬頭一望，碎片猶如雨點落下，感覺超真實！同時遊戲更從《FIFA》系列借來ANT技術，將用於處理球員外貌的系統搬到《Battlefield 3》之上，令每個士兵更似真人，更有血有肉。

中東開打世界大戰

環境真實，士兵真實，連帶故事背景亦夠真實。《Battlefield 3》背景為2014年伊朗同伊拉克邊境，身為美國海軍陸戰隊嘅玩家要應付中東的反抗軍，所以伊朗首都德黑蘭跟鄰國阿曼都係遊戲的主要戰場。大家之前睇電視都可能睇見過一排矮樓房、塵土飛揚的中東背景，遊戲畫面細節已經相當真實，而且戰事更蔓延到北太平洋島嶼、薩拉熱窩，甚至乎係巴黎同紐約，由平地、城區到鬧市市中心大規模戰鬥都有得打。今集另一賣點係可以做埋戰鬥機機師，由地面打到上天，無論係單人Campaign模式到連線模式都有得玩。

PC版64人連線對戰

《Battlefield 3》會推出三個不同版本，但Xbox 360版跟PS3版都只能支援到24人連線對戰，如果想同更多人同時開戰，對應64人連線的PC版就應該更啱大家。另外，《Battlefield 3》亦跟近期其他EA所推出的遊戲一樣，引入新設計的跨平台社交網絡程式Battlelog，可以在應用程式之內同朋友以文字或語音傾談，當中還能顯示每場戰役的實戰數據，亦能夠加入朋友的戰局中出戰，但就一定要在相同平台中先做得到。雖然話上得戰場都係以殺敵為最大目標，但係《Battlefield》更賣埋兄弟情、同胞情，講求互相合作，玩家可以因應戰術需要揀選演Assault、Support、Engineer同Recon四個唔同兵種，但要留意今集重生係冇不死時間，所以負責決定隊友重生地點的Recon責任都一樣重要！

INFO

類　　型： 射擊

開　　發：EA DIC

平　　台： Xbox 360、PS3、PC

推出日期： 10月25日

售　　價： $449（Xbox 360、PS3）$389（PC）

查　　詢： 3166 6001