萬聖節Apps 南瓜玩上身

現在很多東西已經電子化，好似拜神和聖誕心意卡等，加上近年手機Apps流行，應節軟件愈來愈多，就連萬聖節也不例外，不少Apps有齊南瓜頭、七彩糖果同科學怪人作陪襯，配合各式小遊戲，可以一邊感受節日氣氛，又可自娛一番，可謂一舉兩得！

捉鬼靠吸力《iGhost.》

細細個睇完電影《捉鬼敢死隊》，都好想扮主角拿着捉鬼槍和探測儀四處捉鬼。原來依家現實都有得玩，所說的正是最近推出的《iGhost.》。啟動遊戲及衞星定位後，介面就會顯示附近有鬼出沒的位置。然而，猛鬼種類和數量之多，一時都唔知點捉，只要抵受一下遊戲內陰森恐怖音效慢慢找尋，見到時即按着畫面下方的吸塵機，即可成功捉鬼，更可和「收藏品」合照，諗起都覺得變態，但又幾好玩！

怪聲怪氣傳情《Halloween Voice Transformer》

繁忙的都市人往往連說話溝通的時間也沒有，反而有時間於百忙中上Facebook，更每隔一兩小時就說自己忙到甩轆，唔怪得電子賀卡大受歡迎！如果大家真係覺得面對面溝通如斯難於啟齒，不如試玩《Halloween Voice Transformer》。它會將大家的聲音收錄並轉化成科學怪人、骷髏骨及鬼魂等奇怪聲調，然後再轉寄給朋友分享，咁就唔使怕羞又可以聲音傳情啦！

猛鬼農莊《Farm Story：Halloween》

網上玩種田種菜遊戲多不勝數，有的朋友更會每天準時收割，賺取最高利潤。這類遊戲的粉絲要注意了，萬聖節版本《Farm Story：Halloween》登場！此App最大特色是將農場內的人與物添上萬聖節氣氛，如有鬼魂乳牛、笑笑口南瓜樹和鬼面花等，每次收成也會加錢加分，好讓大家升級買新產品，好此道的朋友不要錯過呢！

推銀推到萬聖節《Coin Dozer-Halloween》

推銀仔遊戲曲奇、復活節和寰宇特別版甚麼主題都有，真是好不誇張；估不到最近連萬聖節都唔放過！是次萬聖節特別版設計一點也不馬虎，畫面背景是古老紅頂磚屋，時而圓月高掛，時而星空無光，氣氛極之陰沉，真係夠晒氣氛。再加上不同的可愛道具，如白色鬼、南瓜頭和巫師帽等，愛玩推銀的朋友，萬勿錯過！

夾你個南瓜頭《Prize Claw Halloween》

夾公仔大家現實生活中都玩過，而且仲交咗唔少學費添！依家唔使畀錢都可以過下呢鋪癮，所講的是《Prize Claw Halloween》，內裏全是萬聖節有關的公仔，如南瓜、面具和鬼魂，每個也有自己不同分數幫大家升級。然而，夾公仔每日也有限定次數，加埋指定Collection公仔，要儲齊款式才算爆機，都幾考大家技術！