起來！與高油價對着幹　Volkswagen up！

油價唔停咁升，唔想做「油魔」奴隸、又唔捨得唔揸車，就惟有出部節能環保車仔囉！Volkswagen宣布旗下全新迷你車「up！」，將於今年12月先喺歐洲上市，體積比依家嘅Polo仲細部，不過廠方強調安全性可媲美大型車，而且空間大、耗油量低，導入BlueMotion技術，馬力有成75ps，最緊要係綜合耗油量只有4.3L/100km，踩油唔再肉赤啦！

據知up！將有三個版本，分別係入門版take up！、強調舒適配套嘅move up！，以及頂級版high up！；喺high up！基礎上，仲有up！ black及up！ white之分。Volkswagen品牌設計主管Klaus Bischoff認為，務求要喺細車身上榨取最多空間，最好方法就係將車身設計成長方盒，up！就用咗類似設計，配合2,420mm超長軸距，足夠四人同坐；若果將後座完全放平，行李箱容積就由251L放大至951L，由此可見，up！絕對稱得上係車仔中嘅大肚子。

三大動力配套

up！所搭配嘅1.0公升直三汽油引擎係全新開發產物，馬力輸出有60及75ps兩款，二氧化碳排放量都低於100g/km，綜合耗油量分別為4.2L/100km及4.3L/100km；至於採用相同規格引擎嘅天然氣動力版本，就有68ps馬力，綜合燃料（天然氣）消耗量為3.2kg/100km，同時導入BlueMotion技術，二氧化碳排放量可低至79g/km；電動up！就有望於2013年推出。

暫時只限歐洲市場

雖然up！只係細車一部，廠方亦表明車價將會相當大眾化，但設備嘅多元性就超出想像，既有可供選配嘅「City Emergency Braking」自動煞車系統，透過車頭感應器偵測與前方阻礙物嘅距離，若果判斷有追撞風險就會自動煞車（只限30km/h以下），避免發生碰撞意外。另一方面，中控台上方亦可加裝「Maps + More」可攜式流動資訊娛樂系統（PID），廠方強調PID價格相宜，而且包含埋衞星導航、藍芽電話等功能。講到up！有咁多好處，車迷可能會問幾時到港先？可惜歐洲以外嘅市場仲未有推售時間表，本地車迷惟有畀多啲耐性。