Reporter's Choice

充滿回憶的公仔麵

有些令人食過翻尋味的餐廳，只要冇食一排，便會心思思想去幫襯一下。其中位於南山邨的品香樓，我跟她結緣於大學時代，因為近學校，價錢又夠平民化，而且味道比「瓊天」美味，當年迅即成為我和書友仔的「Hea過天地堂基地」。早前重遊舊地，點了一碟久違了的肥牛炒公仔麵，味道一如以往的偏鹹，但勝在質感不太腍身，QQ的很好吃，配一杯忌廉朱古力，像時光倒流似的。

田園薄荷奶茶

自問是個徹徹底底的都市人，平日甚少走進田野，見到蛇蟲鼠蟻即如臨大敵。今次因工作關係走入上水的假日農場，想不到卻發現了這杯薄荷奶茶。只見師傅即場摘下薄荷葉，然後將用炭爐燒成的紅茶混入黑白淡奶中。呷一口，帶濃濃的薄荷香氣，雖奶味較淡，但勝在充滿炭香，而價錢亦與一般茶餐廳奶茶相若，還附送無敵的田園靚景，好抵飲。看來，香港的美食真是無處不在。

深圳驚喜自助餐

身為飲食記者，對自助餐向來冇乜好感，但見身邊好友最近為了一間內地自助餐廳而瘋狂，便決定親身試試。餐廳名為上井，位於深圳國貿，店子裝潢典雅，食物質素亦不錯，炭燒蝦、溫泉蛋、牛肉刺身、蘆筍、梅酒、清酒等齊備，連港人最愛的海膽刺身和壽司都有。最驚喜的是，海膽壽司並沒有粗製濫造，海膽入口即溶，很鮮甜，紫菜夠脆身，米飯黏度則剛剛好，雖然味道未能跟數百元一件的馬糞海膽相比，但比起不少大型壽司店，卻絕不遜色，加上埋單只需人民幣$220一位，難怪好友們如此着迷。