資深Steve Jobs信徒︰「教主改變了我們！」

10月5日，是全球科技迷哀傷的一天，皆因喬布斯（Steve Jobs）走了，這次他沒有Keynotes，沒有One More Thing，而是靜悄悄地在人生舞台退下來，然而對蘋果迷衝擊之大，卻比iPod、iPhone的面世更為震撼！今次訪問的三位粉絲，大半生也離不開Apple和Mac，有人辭工專心搞Fans Club，有人廢寢忘餐為蘋果開咪宣傳，更有人早在Apple Store登陸前就開班教人使用Mac機；如今教主離去，信徒們心底也有不同的致敬悼詞。

最想擁有傳說之機

Johnny外表十分後生，其實已有26年「信徒」年資，剛出社會工作已自資萬元購買Apple Color Classic電腦，六年前更成立Mactivity，在香港還沒有Apple Store前，為大家提供教學、維修及軟硬件升級等一條龍服務。然而對於蘋果產品，卻一直有所遺憾，因為「傳說之機」LISA從未擁有︰「LISA可算係Mac機嘅前身，83年時售價高達US$9,999，極少數人買得起，根本沒有機會接觸；但佢就率先引入Pull Down Menu及Mouse等電腦概念，加上用咗Steve Jobs私生女個名來命名，極具象徵意義。」

積極夢想家

談到教主，Johnny稱他為「夢想家」，因為他敢發大膽的夢，並會付諸實行，例如早於Apple II時便已有「美國每個家庭都有電腦」這遠見，但當年電腦根本還未普及。「Steve另一優點是執着，對產品手工、顏色及完成度都有極高要求，不會因為成本而停止開發。我很懷疑佢過身後，另一個話事人能否秉承其優點，將來會否出現一些造型未臻完美，或只屬Beta版就直接推出的產品呢﹖所以後Steve Jobs時代的首件產品，真係要睇過先知。」

Johnny

Mactivity創辦人

入教年資︰26年

簡介︰經營Mac & iPod服務中心，多年來提供各項Mac機培訓及維修服務。

處心積慮入Apple

1985年，Derek（魏志豪）首次在學校電腦室接觸蘋果電腦，自此沉醉於黑白遊戲及Basic程式之中。兩年後，成功「說服」爸爸用了整個月薪金購買Apple IIe，一玩就玩了十年，時至今日依然運作正常。「曾經有段時間身邊朋友都轉玩IBM PC，但試過開同一隻Game，Apple卻明顯快好多，我就知道自己選擇正確！」大學畢業，人人爭相投考政府工或投身金融業，他卻處心積慮進入蘋果分公司，最後透過人脈關係，終於如願於97年成為技術支援人員，既接觸到公司最新產品，也取得員工才有的蘋果紀念品，豐富了自己的收藏。

愛教主撥亂反正

一做三年，為了與蘋果維持聯繫，他遂於01年成立「大蘋果眾」（MACitizen），定期舉行講座及Mac友聚會，並透過網站、討論區及網誌向外宣傳，目前會員人數已多達六百多人，成為本地最大型的Mac機用家組織。然而問到蘋果最劃時代的產品，他卻選擇iPhone︰「蘋果未出過手機，一推出就好似爆炸一樣。你上YouTube睇番當年Keynotes，單聽掌聲就知道那一刻觀眾有幾興奮。那時香港遲了一年才有行貨，但之前已有好多報紙爭住幫佢做頭條，一部手機上到頭版，試問有哪個品牌做得到？」Derek補充，他最佩服Steve Jobs夠膽「撥亂反正」，例如Mac新OS X Lion就將Scrolling方向重新定位，將舊模式推翻，正如iPhone改變通訊世界一樣。

震撼好比MJ離世

教主離世，各界爭相發表悼詞，但Derek傷感得來卻不失理智，他謂︰「我可以說是蘋果最根正苗紅嘅一班Fans，我鍾意蘋果時正值Steve Jobs出走時間，所以我比其他人抽離。不過佢嘅成就真係空前絕後，雖然好多技術並非由佢首創，但佢有本事將它們融合起來，量產後兼且大賣，並用短短十年，就打死好多同業對手，爆炸力實在太驚人。佢嘅離世就好比MJ走時咁震撼！」對於後Steve Jobs年代，好多人都不感樂觀，Derek卻有另一睇法︰「傳聞佢走時已放低未來四年嘅Roadmap喺度，加上Tim Cook有一定實力，只要公司蕭規曹隨，相信未來五年都唔會衰得去邊。」

魏志豪（Derek）

大蘋果眾（MACitizen）會長

入教年資︰24年

簡介︰十多年來在不同媒體上發放Apple資訊，是香港致力推動Mac文化的重要一員。

從Apple II+開始

「這是Macintosh Portable，89年出品，係蘋果第一部Laptop。而呢啲就係雜誌《Nextworld》，Steve Jobs另組公司時推出，但嗰陣冇咩人講……」蘋機會（ApproClub）主持人Why對收藏如數家珍，單是不同年代的Apple電腦便多達五十多部，另外又有雜誌、書籍、襟章及手錶等等，歷年共花了百多萬元搜購蘋果物品，說他是蘋果狂熱分子，絕不為過。但原來一切都是由打機開始︰「83年時Apple II曾刮起一片熱潮，我就跟朋友到高登湊熱鬧，但嗰時都係打機多，要到買咗部Apple II+翻版機，先正式開始研究。」

開咪談蘋果

那年頭個個玩PC，蘋果電腦冇人識，要學就要苦讀那些艱深的程式用書，但Why卻沒有想過放棄︰「之後我換了一部正版Apple 2GS，初次看到GUI介面時極為震撼，論技術起碼快PC三年，自此便認為要玩高科技就要玩Apple，不作他選！」愛蘋果，93年時正式開舖賣Mac機，歷年更到過不同與蘋果有關的公司上班。那團火至今依然未熄，今年一月更與朋友Holy Temple成立Podcast電台蘋機會（ApproClub），開咪大講蘋果產品及歷史，他認為︰「Steve Jobs未回歸前，蘋果同佢本人足足沉咗十幾年，中間有一個斷層，令好多網上資料錯誤百出。我自覺研究咁多年，有責任出來澄清，而且開咪同時可跟資深玩家交流，一舉兩得。」

做到至死方休

跟Derek相反，Why對蘋果的前景感到悲觀︰「Steve係曠世奇才，好多人質疑佢並非工程師出身，從未自己砌過一件Hardware出來，但佢卻係全球最出色嘅推銷員及企管家。蘋果一直有好多叻人，但Jonathan Ive同Tim Cook要等佢回歸後才得到重用，證明有優質食材，都要有好廚師才煮得出佳餚。現時蘋果問題係將軍一去、大樹飄零，冇人話到畀大家聽，科技如何走下去！」Why補充，他最欣賞教主做人夠堅持，「好像iPod初推出時被人鬧到飛起，但冇佢嘅堅持，iPod第三代點能夠大賣，又點會有之後嘅iPhone同iPad呢﹖佢走時仍留下iPhone 4S，就係佢做事至死方休嘅最佳例子！」

Why、Holy Temple

蘋機會（ApproClub）主持人

入教年資︰28年

簡介︰從事蘋果銷售工作20年，近年透過大氣電波評論蘋果產品。