Android vs iOS開GAME打餐飽

Android及iOS用戶一向河水不犯井水，就連打機都各有各玩，互不相干。然而，若身邊朋友的機款不同，冇得連線對打就相當冇癮！有見及此，近年遊戲公司在開發遊戲時，都會照顧到兩個平台需要，令兩組用戶只要透過3G或Wi-Fi網絡，便能連線對打甚至組隊齊齊打怪，令大家享受到跨界打機嘅樂趣。

連線打魔獸《Order & Chaos Online》

費用︰US$6.99（iOS）/HK$54.46（Android）

《魔獸世界》大家喺電腦就玩得多，手機版又玩過未？此作由Gameloft推出，遊戲風格類似魔獸，同樣設有公會及組隊系統，並設有四種職業供選擇，包括戰士、法師、僧侶及遊俠，挑選後就可與另外四名好友組隊接任務齊齊冒險。遊戲任務多達500種，由狩獵、搜集素材到擊倒巨型敵人都有，夠晒多變，保證有排玩！但注意遊戲對硬件及網絡要求都幾高，用3G連線難免有少許Delay，建議開Wi-Fi玩。

齊讓子彈飛《Guerrilla Bob》

費用︰US$0.99（iOS）/HK$11.61（Android）

《Metal Slug》係經典動作遊戲，《Guerrilla Bob》主人翁同樣係兩個Q版大叔，但畫面就變成全3D，配合大量真實武器，比橫向的《Metal Slug》更加好玩。遊戲僅對應Wi-Fi連線，只要其中一個玩家開Game，另外三名玩家再輸入IP位址即可四人對打；由於大家在同一網絡下，因此所有動作都幾近同步，不怕因其中一方Delay而拉死其他玩家，玩落自然更過癮！

鬥快送石頭《Jewel Battle HD》

費用︰免費（iOS/Android）

齋聽名會以為係《鑽石方塊》，但話明係「Battle」，當然冇咁簡單。遊戲玩法好簡單，只要把三枚或以上同類型的鑽石打直或打橫連成一線，便能取得分數，這時對手的部分鑽石會變成石頭，當其中一方再沒有可用的鑽石時，便為之Game Over。聽落好似冇咩難度，但鬥快「互贈」石頭其實相當考眼界及反應，上癮指數極高！

大熱牌局《三國殺》

費用︰免費（iOS/Android）

這紙牌Game風靡內地，現在連手機都有得玩。遊戲以三國人物及背景為題材，各人會隨機扮演主公、忠臣、反賊或內奸，然後按每回合手持的牌，例如武將牌、體力牌、錦囊牌，向其他玩家進行補血或攻擊，直至主公或反賊被消滅便為之完成一局。除了五人或八人對局外，手機版還提供「1對1」及「3對3」模式，玩法比紙牌更豐富。

八人大空戰《Skies of Glory》

費用︰免費（iOS/Android）

手機上嘅飛機Game，來來去去都係2D畫面，操作公式化，新意愈來愈少。《Skies of Glory》不但改用3D顯示，最正係支援體感操作，只要擺動手機就能控制戰機向不同方向飛行，讓玩家猶如坐進駕駛艙一樣。遊戲可經3G或Wi-Fi讓兩大手機平台的玩家對戰，惟實測所見，Android版本的畫面仔細流暢，有較佳的視覺享受，反而iPhone版就不時出現狗牙。