東京直擊！BA耳筒搭手機 音色變靚了
音響組合或座地喇叭，配備三、四個高中低音單元一啲都唔出奇，但勢估唔到連手指頭咁細嘅入耳式耳筒都做得到！講緊就係Sony日前於東京發表嘅全新BA耳筒系列，採用了Balanced Armature技術，將高、低、超低及全音域四組單元微縮至耳筒之內，就算用iPhone都聽到發燒級音效。同場仲有防水、藍芽及數碼減噪等11款型號登場，全部11月在港發售，以後聽靚聲就唔一定要用重到死嘅「大耳牛」了！
精密小巧
市場上大部分耳筒都採用動圈式單元，雖然技術成熟兼抵用，但就經常被發燒友批評聲音不夠細膩。今次Sony自家研發嘅Balanced Armature（平衡電樞）單元就有可自由調校音色嘅特性，具高靈敏度及高解析度，可清晰呈現原音。而這技術原來源自助聽器，因此與敏感度相若嘅13.5mm動圈式單元相比，其體積就少了75%之多，這不但可在單一耳筒內植入更多單元，更可把阻抗值降低至24ohm，就算係一般Smartphone或iPhone都夠力谷到盡，所以官方亦不諱言手機用戶係今次主打客戶群。
音域極廣
BA耳筒前後共用了三年來研發，產品線亦多達五類、十一款，當中主打型號包括XBA-1、XBA-2、XBA-3及XBA-4，分別配備了一至四組單元，當中最勁嘅XBA-4就內置了全音域、低音、超低音及高音四單元，照顧到不同音頻需要。現場試聽Gorillaz的《Feel Good》，人聲細膩、低音雄渾，只略嫌高音有點散；但測試版仍是Sample，加上未曾「煲機」，相信賣街時音色會有所提升。特別一提，試聽時發覺耳筒沒有一般入耳式嘅漏音問題，原來它們均採用了雙層機殼設計，減少漏音之同時更可隔絕噪音，怪不得咁靚聲啦！
XBA-1至XBA-4 SPEC
單元數目：1至4組
功率處理量：100mW
阻 抗：24ohm於1kHz
靈 敏 度：108dB
頻率響應：5Hz至25,000Hz
導線長度：約1.2米
插 頭：鍍金L型立體聲迷你插頭
重 量：約3g
售 價：待定
查 詢：2345 2966
同場加映
防水防汗 XBA-S65
好多人都鍾意跑步聽歌，XBA-S65就為此而設，內置高度傳音嘅防水薄膜，並採用可調校嘅掛耳式設計，防汗之餘又緊貼耳骨，就算跑100米都唔怕飛甩！佢仲支援IPX5及IPX7防水標準，保證可於一米水深下能正常運作30分鐘，真係帶去衝浪都可以！
細絕全球 XBA-NC85D
市面嘅入耳式數碼減噪耳筒都需連接電池盒以供電，佩戴時既異相又累贅。XBA-NC85D就聰明地將電池同控制電路放晒入耳筒內，令佢成為目前全球最小巧嘅同類型耳筒。另一巴閉之處係跟機送USB充電器，去到邊都能即時充電。
飛走電池盒 XBA-BT75
設計原理跟XBA-NC85D相若，只係連藍芽控制電路都一併放埋入耳筒內，毋須外掛電池盒，佩戴自然輕鬆好多。惟注意是續航時間只有3.5小時，同類產品來說唔算長，好彩係跟機耳筒盒兼備充電功能，夠「餵飽」耳筒兩次或以上。
XBA-1得兩毫子咁大，只重3g，真係戴咗都唔覺！
附送四種混合矽膠耳塞及三種隔音耳塞。
BA系列外層為ABS物料，可減低震動帶來嘅影響。
耳筒的插頭經鍍金處理，將失真減到最低！
XBA-4解構圖，內有兩層機殼，及四組單元。
另有「iP」系列，附有線控及收音咪，可當作免提使用。
工程師投野耕冶表示，開發過程中最困難係縮細耳筒，單係初期模具就有12個之多。
Sony好少為耳筒搞海外發布會，今次更由中川克也（左）及青木陽現場擠滿亞太區傳媒，耳筒亮相一刻相機更閃到七彩！
現場擠滿亞太區傳媒，耳筒亮相一刻相機更閃到七彩！
發布會選址在東京品川的Sony本部大樓舉行，之前仲有得行Showroom，可惜現場唔畀影相！
全線BA耳筒最快11月於香港有售，價錢介乎$800至$4,000之間；最正係購買後唔滿意，可於明年1月前全數退款，足見廠商信心之大。
XBA-S65
掛耳式設計，方便做運動。
符合IPX5及IPX7防水標準，掂！
掛耳部分可自由調校長短，保證男女都啱戴。
XBA-NC85D
XBA-NC85D體績細絕數碼減噪耳筒。
USB充電4小時就夠聽20小時。
XBA-BT75
耳筒盒可當埋叉機用，而且仲同耳筒夾晒色！
整合了電池及藍芽控制電路。