中世紀版《Dragon's Dogma》延續芒亨熱

觀乎今年東京遊戲展最捨得搞舞台設計的，就係Capcom，每隻主打遊戲都設有特色主題館，如《Street Fighter × Tekken》就有十分日式的試玩區，而N3DS遊戲《Monster Hunter 3（Tri）G》便用上丹基亞港作展場設計，另外《Dragon's Dogma》展區內設有一條怒吼中的巨龍。N3DS版「芒亨」預咗多人排隊玩，但估唔到另一隻新開發遊戲《Dragon's Dogma》風評都相當好，又係「芒亨」式打怪，不過換成西方中世紀設定，用弓、用劍、用魔法怒劈滿場怪物，爽！

Capcom：《Dragon's Dogma》似魔戒版芒亨

《Dragon's Dogma》是玩中世紀奇幻風格設定的動作遊戲，係第一隻以開放式世界設計的Capcom遊戲，玩法同牌面都幾吸引。遊戲玩落都甚具水準，只係武器無「芒亨」咁特別，只可用魔戒式的大劍、弓箭甚至魔法攻擊巨獸和巨龍，即係一般歐美玩家玩開的風格，照計香港玩家都啱玩。

至於另一重頭作品，毫無疑問會是《Monster Hunter3（Tri）G》，雖然早幾日Capcom公布會開發《Monster Hunter4》，但無損大家對這隻N3DS版「芒亨」的熱情。遊戲系統沿用家用版，而操作則近似《MHP 3rd》，而且為彌補N3DS右邊只設十字掣難轉視點之問題，於是可用下顯示屏觸控轉視點，或另購右Analog掣模組。會場試玩版就提供初、中及高級難度關卡，以四人一組出戰，挑戰今集主角「布拉奇迪沃斯」，玩落真係幾難打，但流暢度相當唔錯，　景深亦有水準，推出後應能有助N3DS銷情。

此外尚有另一新作《阿修羅之怒》（《Asura's Wrath》），屬奇幻風格的動作遊戲，講阿修羅被打落凡間，憤怒地大開殺戒挑戰成個星球咁大嘅Boss，又爽快又有玩味，都幾值得期待。

Sega：破格射擊遊戲

Sega係另一間有睇頭的遊戲公司，筆者都估到佢會繼續食《人中之龍》的老本，繼去年《人中之龍黑豹》後，換上新角色推出《黑豹2人中之龍阿修羅編》，今集仍以四人協力方式進行，並以大阪蒼天崛作遊戲舞台，玩法跟舊作接近。值得一提的是以2080年之日本為舞台的第三身射擊遊戲《Binary Domain》，敢於挑戰向來被視為日本遊戲的弱項，現場看效果頗有水準，動作質量都唔錯。

Konami：高清版MGS仍吸客

Konami每年都係由小島的《Metal Gear Solid》系列跟《Winning Eleven》系列撐場，今年當然唔例外，不過《Metal Gear Solid》方面只係以高清Remaster版出戰，包括集《MGS2》跟《MGS3》於一身的高清版《Metal Gear SolidHD Edition》及將PSP版高清化的《Metal Gear Solid Peace WalkerHD Edition》，新意欠奉。而講咗好耐預定下年推出的《Metal Gear Solid: Rising》仍未見影，有些失望。至於由香川真司做代言人的《Winning Eleven 2012》，Konami展區內就提供3D試玩版，但跟2D分別不大，純屬Gimmick。新遊戲方面，還有標榜自由度高的動作遊戲《NeverDead》，算有趣，但難擔大旗。

SCE：《二之國》似足宮崎駿動畫

SCE將全力放在PS Vita身上，而真正由自己開發的新PS3遊戲真係唔多，但今年無擺檔的Level-5《二之國：白色聖灰的女王》成為主力，此遊戲為一套奇幻的冒險RPG，由Ghibli Studio做人設及開發，久石讓負責音樂，一開機就好似睇緊宮崎駿動畫一樣，Fans們冇得唔玩。

Namco Bandai：星矢高達雙雙出擊

Namco Bandai Games主力遊戲有《機動戰士Gundam Extreme VS》跟《聖鬥士星矢戰記》，前者改編自同名街機遊戲，2 vs 2打法，玩得爽快；至於《聖鬥士星矢戰紀》是以漫畫版聖域十二宮編為題的動作遊戲，達到一定條件就可發動黃金聖鬥士施展各種絕技戰鬥，現場試玩畫面表現到位，應可滿足Fans要求。空戰迷等咗好耐嘅《Ace Comat》系列新作《Ace Combat: Assault Horizon》，應為系列第七代的新作，特別之處在於以真實世界做背景，以空戰揭破以非洲為起源的陰謀，空戰場面比以往更激烈，玩得投入。

Microsoft：體感玩《FM4》

Microsoft雖然無跟其他外國參展商一樣退出東京遊戲展，但展區規模就只得往年一半左右，Kinect試玩台只剩低三個。不過Kinect仍然係最能吸客的遊戲，即場可試的，就有下月推出的《Forza Motorsport 4》，玩家可以體感揸車；另外，還有大跳勁舞的《Dance Central 2》同體感運動遊戲《Kinect Sport: Season 2》。更有睇頭的，反而係來自場外Capcom跟FromSoftware合作的Kinect版《重鐵騎》示範，使用手掣操控移動方向之餘，還可配合各種手勢操作，如拉下望遠鏡，出拳打同伴，一企起身就能打開坦克車頂等，非常過癮，值得期待。