LEGO Cult爆外星人

LEGO一向形象正面、益智，又點會同「Cult片」扯上關係呢？純屬個人意見，啱啱上架嘅「異形突襲」系列（Alien Conquest），由故事設定到當中嘅異形及UFO造型，都令人聯想到添布頓（Tim Burton）嘅搞鬼名作《火星人玩轉地球》（Mars Attacks）；雖然呢個LEGO系列嘅主打年齡層係6至14歲，不過對「火星人襲地球」呢個長青嘅科幻題材中晒毒嘅Kidult嚟講，一樣唔買唔安樂。

異形陣營

UFO捉農夫

耐唔耐就會傳出外星人綁架地球人嘅傳聞，原來LEGO Alien Conquest都唔例外，Boxset 7052嘅異形就揸住部Cult爆嘅UFO，吸咗個農夫上船，好彩撞啱有異形先鋒隊喺度演習，唔知救唔救得番呢位唔識Rap歌、淨係識揸犁耙耕田嘅農夫呢？

母艦襲地球

呢次異形襲地球認真大陣仗，唔只出動爪牙及UFO，就連異形首領及異形母艦都御駕親征，仲將唔怕死做現場報道嘅女記者捉埋上船。點解異形首領大駕光臨都唔設立核心保安區？唔通警察連咁大隻UFO都當係黑影？

地球人陣營

大卡車迎頭痛擊

《火星人玩轉地球》嘅前半段，地球人被火星人打到毫無還手之力，LEGO Alien Conquest嘅地球人就冇咁水皮喇，仲成立咗異形先鋒隊還擊，唔只個個隊員戴晒頭盔、擸晒雷射槍，喺10輪大卡車嘅地球防禦總部（Earth Defense HQ）裏面，仲有研究室及科學家做Backup，又可以發射導彈及攔截穿梭機嚟個迎頭痛擊，問你班異形識驚未？

直升機重火力升空

異形出動UFO，地球人都有噴射直升機捍衞領空，大大部之餘，仲全身有齊機槍、導彈，打得又睇得。不過咪以為異形會知難而退，你有張良計、佢有過牆梯，原來艘UFO可以玩分體，畀直升機窮追時就分頭較腳，睇你追得邊一個？

查詢：2262 7186（LEGO HK）