日本直擊搶打PS Vita

今屆東京遊戲展昨日開幕,亮點就是場中唯一新遊戲硬件─新一代手提遊戲PlayStation Vita。此機在1月時首度露面,6月E3時公布開售價錢,今次東京遊戲展更進一步公布會於今年12月17日在日本推出,兼夾有26套專屬遊戲軟件護航,可說是歷來最龐大的陣容。香港幾時有得賣仍係未知之數,或有機會趕得切今年聖誕檔期舉行的AGS都未定;而TGS現場就有超過80部PS Vita及逾30款新PS Vita遊戲任玩,小記當然要立刻送上第一手試玩報告啦!

花絮1:TGS規模較去年細

日本在3月經歷了大地震及核電廠爆炸災難,震後初期仍未知東京遊戲展會否如期進行,及後終能按計劃舉辦。今年東京遊戲展主題為「Game-Dancing Your Heart」,仍舊一連4天在幕張Messe舉行,首兩天只開放給業界參觀。雖然今年參展商數跟出展遊戲都跟去年差不多,但展區總面積就約比去年小15%,不過依然咁有睇頭!

INFO

展覽地點:日本千葉縣幕張Messe

展覽日期:即日至9月18日

預期參觀人數:190,000人次

80台PS Vita主機任玩

跟PS Vita同日推出的遊戲多達26套,除此之外,現時更有近百套遊戲軟件正在開發,當然大家唔會預期全部可在這一、兩年內推出,但係TGS Sony攤位就已經有80台PS Vita供大家試玩超過30套新遊戲,難怪Game Show一開始就排長龍。喺排隊試玩唔同遊戲之前,要經過一個簡單的PS Vita操作訓練,在畫面上以Multi-touch方式按着數目順序篤畫面。由於排隊人數眾多,所以今次試玩區都好均真,每個試玩台上都有計時器,夠鐘就要離場。而每隻遊戲的試玩時間都唔同,好似PSV版《Ridge Racer》就可試玩5分鐘,大概玩到3個圈。雖然多人排隊,但由於排隊前先要分流,揀定所玩遊戲,因此也不需要排好耐,第一日試玩最多排20分鐘就得。

花絮2:SCEJ發布會:TORO貓搶鏡

由於平井一夫紮職轉到Sony睇晒Consumer Product同Network Service,所以今年的SCEJ發布會就由現任SCEJ President河野弘主持。發布會上除交代PS Vita在日本的推出時間外,亦宣布跟NTT docomo合作推出3G Data Plan,分20小時及100小時兩個版本,前者開價¥980,而後者則是¥4,980,以現時日圓匯價嚟計,都算幾高。香港方面都可能都有相類似計劃,不過目前正跟唔同網絡供應商傾緊,暫時未有定案。多間日本遊戲大廠如Capcom、SQUARE Enix、Konami都有上台發布PS Vita新遊戲,其中最有趣係Capcom的小野義德除咗話會跟PS Vita同日推出《Ultimate Marvel VS Capcom 3》外,亦宣布為《Street Fighter × Tekken》追加PS吉祥物TORO同KURO參戰,只見身形嬌小的TORO識出波出昇,仲打到神高神大的對手一仆一碌,夠晒話題性!

PS Vita SPEC

處 理 器:ARM Cortex A9 Core(四核心)

記 憶 體:512MB

圖像處理器:SGX543MP4+(128MB)

顯 示 屏:5吋1,677萬色OLED Multi-touch顯示屏

(960×544解像度)

體   積:182×18.6×83.5mm

重   量:260g(Wi-Fi)/ 279g(3G+Wi-Fi)

日本推出日期:12月17日

日本售價:¥24,980(Wi-Fi版)/¥ 29,980(3G+Wi-Fi版)

PS Vita小知識

PS Vita可否兼容PSP遊戲?

大部分以往經PSN下載購買的PSP遊戲都可在PS Vita上運行,至於購買UMD遊戲碟的用家,目前SCE還在計劃點樣解決這個問題。

PS Vita電量表現如何?

PS Vita會採用內置電池,電力足夠打機3至5小時,而睇片則大概有5小時,音樂播放時間則約9小時。

Brian

試玩PS Vita時可帶埋Sony耳機一齊打,但每次遊戲試玩都有時間限制,所以好多人一埋位就好認真地狂打。

現場展出全套PS Vita配件。

由於試玩台夠多,加上限時試玩,就算人山人海都唔需要排好耐。

充電插座設計特別,但售價唔平,要¥2,800。

KURO跟TORO「緊急參戰」絕對係今次發表會的一大話題。

發表會上邀得多位神級製作人出席,如小島秀夫(左二)、小野義德(左三)等。

今年SCEJ發表會由SCEJ President河野弘主持。

《Ultimate Marvel VS. Capcom》
推出日期:12月17日
以為Capcom會先推PS Vita版《Street Fighter × Tekken》,但原來係新發表嘅《Ultimate Marvel VS. Capcom》先真,畫面表現絕對高班,仲可以應用到專為PS Vita而設的Touch Panel。

《全民高爾夫6》
推出日期:12月17日
此Game應用到PS Vita的輕觸功能,可以在揀選角色畫面時放大、縮細角色,打波時要直接按畫面揀打波路線,最特別係可以應用到傾斜機身改變視點來增加投入感,可愛之餘又唔難上手。

《Reality Fighters》
推出日期:未定
好一套走Casual路線的「真人」格鬥遊戲,開打前要為自己影相變成遊戲角色,然後可用埋機背鏡頭以AR模式將實景Key入做格鬥舞台,真係好有Smartphone遊戲Feel。

《Ridge Racer》(暫名)
推出日期:未定
PS有新機出,當然會預埋《Ridge Racer》一份。這套未定名嘅新遊戲應用新功能的元素不多,但畫面表現比以往手提機大有進步,做到次世代遊戲主機的前後景深效果。

《Asphalt: Injection》
推出日期:未定
有玩開iOS遊戲,應該唔會對《Asphalt》賽車系列感到陌生,今次搬上PS Vita的新一集《Asphalt: Injection》就跟iOS一樣,在特殊操控模式下可應用傾斜機身轉向,速度感強外亦極易上手。

《忍道2 散華》
推出日期:12月17日
以忍者為主題的潛入刺殺遊戲,本身已大把Fans,但當忍者碰上輕觸式玩法就當然更加好玩。