on.cc 東方互動主頁

110km深入測試　性價比高Nissan LEAF

日產（Nissan）最新嘅量產電動車LEAF，唔只實現零油耗、零排放，扭力輸出仲比得上3.0公升車種，加埋免稅、牌費又低，性價比相當高。筆者早排向代理借嚟做長期測試，用快速充電機「快叉」30分鐘至八成儲電量，以唔激進、唔刻意慳油嘅方式駕駛，大約走咗110km，除非用LEAF做搵食車，否則續航力足以應付日常需要。

電動車充電機有「快叉」及「慢叉」兩種，「快叉」可以喺30分鐘內完成80%充電，「慢叉」就要八個鐘左右，不過就充足100%，可惜目前「快叉」充電站只有三個，如果住所及工作地點附近冇充電站，又要日日用車，只好到佐敦、沙田或鴨脷洲嘅快速充電站充電了。

牌費低　免埋首次登記稅　

每年牌費只需$725、而且豁免首次登記稅嘅LEAF，性能及Ride Quality都令人非常滿意，若果充電設施配套完善，電動車確實好吸引。市場上多款電動車之中，LEAF嘅技術及續航力已經係最出色嗰款，滿電之下可連續行駛160km（以US LA4模式計算）。當然，160km只係最理想嘅數字，實際可行里數仍會依駕駛方式有所調整。一般情況下，行130km都冇問題，不管你信不信，反正我做到了。假如閣下習慣腳腳「地台油」、又要跑長途，無計啦，電動車就唔多適合你。

等快叉　需時30分鐘

LEAF以「雙零」（零油耗和零排放）掛帥，唔好期望性能有幾勁、又幾好彎，舒適先係王道！反正唔使油錢，長測期間頻頻做「柴可夫」，接載同事返工、放工，個個嘅反應都係「邊有咁靜o架？」仲異口同聲認同乘坐質素（尤其是前座）拍得住豪房，美中不足係後排座墊高咗啲。整體嚟講，LEAF都令我好滿意，只係充電期間唔知點打發時間，喺停車場等半個鐘又太熱，一出一入停車場又好無謂。連日嚟去咗四次充電站，每次都係喺停車場升降機大堂呆等，如果日後充電做到入油咁快，三、兩分鐘就完事，你話幾好呢？到時你送架電油車我揸，我實嫌佢唔夠環保！

長途行車　改用ECO

用電動馬達驅動嘅LEAF，唔會有引擎及排氣聲，唔理你加速時畀幾多油，車廂依然咁靜，只係聽到輕微嘅路噪及風噪，一般中型車都未必做到。力量方面，佢嘅最大輸出功率為80kW、扭力為28.5kgm，D檔之下盡油起步，加速表現跟3.0公升NA車種相似，瞬間已突破100km/h，不過會大幅增加耗電量。相反，電動馬達喺ECO模式下會自廢部分功力，以慳電為目標，任你點鞭策都唔會加快步速，想延長續航力，一定要靠ECO模式。

行車太靜　小心超速

要舒適，LEAF畀到足，若果要求好彎、好劈，建議你都係儲多廿萬買370Z算數，LEAF嘅底盤設定從來唔預你去跑彎，一切以舒適為主導。電動車嘅特性係扭力隨傳隨到，上斜爬頭變得好輕鬆，但要注意車廂實在太靜，有機會影響到速度判斷，未熟習開電動車前，盡量開慢少少、多啲留意速度計，尤其喺公路行駛，中咗快相咪怪我冇提你。

落場版未跑過

咪睇LEAF個樣斯斯文文，就以為它快唔起，其實都有機會落場同人鬥車。喺今年初紐約車展上，廠方就首度發表LEAF Nismo RC，RC即係Racing Competition嘅縮寫，講到明係落場版啦！車重比量產版輕40%，只有936.8kg，裝埋全套擾流，離地距只有2.4吋。動力系統就與LEAF相同，不過0-100km/h只需6.85秒，極速148.8km/h。不過LEAF Nismo RC仲未正式落場參賽，只係喺各式賽車活動展出而已。

幫馬拉松帶路

唔講唔知，原來早年日產都為President開發咗電動版，仲要係開篷版！廠方指出呢部產於1991年嘅電動車，主要用途係作為巡遊或馬拉松比賽嘅帶頭車，搭載一具24kW電動馬達，0-30km/h可在三秒內完成，極速40km/h，續航力100km。President電動開篷車嘅體積非常大，長、闊度分別達5,225mm及1,830mm，最多可坐五個人。

電動始祖Tama

早喺1947年，日產已經開發出電動車Tama，佢嘅車長只有3,035mm、闊度1,230mm，屬於小型車類別，佢嘅電動馬達（36V）輸出功率只有3.3kW，就算車重只有1,100kg，極速都只係35km/h。Tama嘅電力來源係鉛酸電池（40V/162Ah），每充電一次可行駛65km。其後Tama仲衍生出Pick-up車型，整個車系就喺1950年停產。