面書專機 ChaCha一按即Like
雖然最近有報道指Facebook受「社交網疲倦症」影響而大量流失用戶，但貴為全球最大社交網，Facebook依然大把人玩。HTC就看中這龐大市場，推出專用手機ChaCha，此機底部有個「Facebook分享鍵」，只需一按即可極速留言、打卡兼Post相，加埋完整QWERTY鍵盤，真係幾得人Like喎！
「面書」有幾多人用？唔計網頁版，原來單是手機版每天便有2.5億用戶，這亦引伸出INQ等Social Phone出現。今次呢部ChaCha，更被HTC定位為「Facebook Phone」，皆因機身設有「分享鍵」，今年初於MWC發表時更獲Facebook創辦人Mark Zukerberg出口力撐，證明「分唇」獲官方肯定。
分享鍵 按下Post相
小記不少朋友都埋怨手機版Facebook不時出現啲掣移晒位嘅情況，留言時又要逐頁轉，不太方便。如你都有咁嘅煩惱，那麼ChaCha便啱晒你，因為機底設有一個藍色的「f」鍵，只需一按，便可即時跳到塗鴉牆留言，過程中既毋須開Facebook，也不用上網，勁方便！分享鍵還對應Facebook其他服務，例如長按可即時定位打卡，睇片、聽歌；上網時按下，又能把相關相片、歌曲或網址「掟上」Facebook，用落發覺比網頁版還要貼心。特別一提，手機還預載了「Fb聊天室」功能，可經此與朋友Free Chating，Whatsapp都唔使用！
QWERTY鍵 一物多用
玩Facebook經常要留言，然而篤芒打字就經常打錯。ChaCha比之前同廠Salsa優勝之處，在於搭載了完整的QWERTY鍵盤，不但有齊26個英文字母、方向鍵及Space Bar，部分按鍵還一物多用，例如長按句號可跳到拍攝模式，長按Space Bar則可撥號，方便留言時立即跳到其他介面。輸入法方面，提供手寫、倉頡、速成及筆劃4種，同時按下「FN+Space」則可轉換輸入法，即同電腦一樣，好易記。實測所見，按鍵間距適中，標示亦清晰，惟按鍵表面沒有倉頡字根，回彈力不高，若能一併改善便堪稱完美。
窄屏幕 字元較細
一如HTC其他智能機，ChaCha都預載了Sense介面，並採用HTC Sense 2.1 Messenger版本，照樣提供7版頁面，只是主頁位置由過往的中央移至左端，另外，若頁面沒有任何Widget，它們就會自動消失，令介面更為簡潔。然而要留意的是，由於ChaCha只有一個2.6吋HVGA屏幕，因此打字時字元較細，網頁亦未能全屏幕顯示，購買前要有心理準備。幸好其他功能尚算齊全，包括500萬像素鏡頭連LED閃光燈、藍芽3.0、802.11n及Wi-Fi Spot等，另外瀏覽器也支援Flash，因此玩到面書小遊戲。
SPEC
制式：GSM四頻、WCDMA
作業系統：Android 2.3
屏幕：2.6吋HVGA（480×320解像度）
鏡頭：500萬像素（後置）、30萬像素（前置）
記憶體︰內置512MB，支援最高32GB microSD
對外連接︰藍芽3.0、microUSB、7.2Mbps HSDPA、802.11n
通話時間：450分鐘（GSM）、400分鐘（WCDMA）
備用時間：400小時（GSM）、640小時（WCDMA）
體積：114.4×64.6×10.7mm
重量：124g
查詢：3520 1234
$2,398
銀色塑膠電池蓋經過霧化處理，觸感有點像陶瓷。
機尾微微向上翹起，特別貼手。
按鍵間距適中，只是回彈力較低。
機底特設Facebook分享鍵，一按即可呼叫出不同社交功能。
厚10.7mm，直機身來說唔算薄。
要拆電先換到SIM卡同記憶卡，唔夠方便！
預載了Facebook程式，只是屏幕太細，要上下滑動先睇得晒。
採用Android 2.3系統，並可放入時鐘、Facebook等不同Widgets。
瀏覽器支援Flash，睇到ontv。
對應人臉對焦及觸控對焦，影人效果唔錯。
只要一按分享鍵，即可立即留言及Post相。
提供7版頁面，但必須每一頁都有Widget才能保留下來。
手機還內置「快速啟動」功能，可為26個字母設定功能捷徑。
睇相時按「分享鍵」，即可把相片掟上網絡。
試相區
色彩、測光不俗，微距對焦亦又快又準，很適合用來影玩具Post上網。