鐵血Noland換裝逃亡

去年上畫嘅新一輯《鐵血戰士》（Predators），繼續玩血獸捕捉人類呢條橋；除咗血獸，相信最引人注目嘅角色，未必係男主角Adrien Brody，反而係「死剩種」Noland。而飾演Noland嘅Laurence Fishburne熟口熟面，佢咪就係《The Matrix》戴住副夾鼻黑超嘅Morpheus囉！今次HT推出嘅Noland，跟足電影設定，有晒Full Gear盔甲及武器，重現招牌面具Look。

電影裏面Laurence Fishburne飾演上一批「獵物」嘅生還者，被血獸追殺得耐，面容難免盡現滄桑感。今次頭雕由Noh Sung Woon操刀，果然捕捉到憔悴嘅神情，官方都好快完成版權審批。不過你好記性嘅話，就會發覺電影中嘅Fishburne有啲發福，Figure版反而瘦削咗啲。另外，笠咗血獸裝備嘅Noland，最令人入腦當然係血獸頭盔，雖然係膠製組件，不過HT做足仿金屬質料塗裝，又落埋銹迹舊化，旁邊亦跟足電影用布料接合，逼真度令人滿意。

中日聯手　打造逼真Parts

雖然只得一款面相，不過計埋戴頭盔，都算有兩個Look。而且HT搵埋本地雕開Predator嘅Joseph Tsang幫手，雕多一套Full Gear配件，包括束帶、護腿、伸縮矛都有齊，呢個全武裝造型就連電影都未出過，夠晒原創性。除此之外，今次仲有嚟自日本嘅Kouhei Okui操刀，此君有份雕製李小龍Figure Body，今次就負責炮製衫、褲、鞋、雷射槍、骨斧頭等Parts，務求每個細節都重現到電影神髓。

做足舊化　鋼鏈袖失真

除咗Parts講究，Figure嘅Detail位都落足心思。Noland喺森林畀血獸日追夜追，套衫完好無缺肯定冇人信，仔細留意胸甲嘅話，就會發覺有唔少爪痕，衣領袖口位都有「披口」，就連藍色衫袋都落足雕工，忠於電影設定。美中不足係雖然右手都有鋼鏈袖，但可能受物料所限，望落似魚網多啲，有啲礙眼喎！

查詢：2388 4677