首屆Gamania Game Show 4大遊戲速報

今個禮拜東京遊戲展開鑼，但Online Game大廠Gamania上星期就搶先在台北舉辦首屆Gamania Game Show（簡稱GGS）。今次GGS跟大家熟悉嘅東京遊戲展以及香港舉行嘅亞洲遊戲展唔同，公眾完全免問，只邀請了香港、內地、韓國、日本、歐洲及美國100位傳媒出席。而展出的《Core Blaze》嘅高自由度打怪物以及《蘭格利薩戰紀》嘅嶄新遊戲系統，都可以話係目前Online遊戲頂尖之作！

華山文創園區舉行

由一間廠商擔正舉辦，仲要搞得咁大型的遊戲展，實在少有，而且Gamania更選擇在有如香港牛棚的台北華山文創園區舉行，跟遊戲主題真係幾Match。雖然今次GGS只係招待台灣跟世界各地傳媒約百多人，但統籌方面卻十分認真，既設有主力發布會場館，另每款主力遊戲又各佔一個小型場館，並設有自家傳媒工作室，甚至連Gamania自家小賣部都搬到展區呢！雖然唔係對外開放，但排場跟各大型遊戲展有得揮。目前Gamania自行開發遊的戲只佔市場十幾個巴仙，但今次4款主打遊戲《Core Blaze》、《Tiara Concerto》、《蘭格利薩戰紀》跟《Dream Drops》都係由Gamania旗下開發室所開發的原創遊戲，可見廠方有心有力推動自家線上遊戲，唔使再靠韓、日Online遊戲撐起業界。

《Core Blaze》自由度高4人打巨怪

在4款新遊戲當中，以《Core Blaze》風格最與眾不同，唔玩可愛同「萌」，而係專為Hardcore機迷而設的動作打怪遊戲，感覺上好似「芒亨」，但玩落卻比「芒亨」先進。老實講，以前Online Game畀人感覺都係畫面較弱，但今次《Core Blaze》以Unreal 3遊戲引擎開發，無論係遊戲流暢度及動作細緻程度，都真係有得同家用遊戲相比，就好似今次GGS試玩版所面對的巨型Boss，係一隻叫「梁渠」嘅豹形巨物，用巨爪攻擊加上在峭壁上三角跳已經夠厲害，仲識得用遠距離寒氣攻擊，唔用遊戲道具玩火燒佢都真係好難打。搭配唔同道具係此遊戲之一大強項，而且在場景設計上亦不止限於平面上移動，可以在場景內爬梯、爬牆往高處搵路走，都幾有FPS遊戲感覺。GGS試玩時，可以揀刀盾、巨劍、雙刀及長弓4大武器系統出戰，而且在打怪途中亦可以換武器，仲可以跟場景內物件互動，如能夠劈樹木造橋過河；雖然現場試玩版無得試，但淨睇遊戲咁多新玩法，都真係好令人期待！

類型：MMORPG

推出日期：預計2012年下半年

《Tiara Concerto》萌系音樂RPG

本地遊戲開發公司火狗工房相信好多玩家都聽聞過，成名作《愛神餐館》亦有唔少人玩過，原來佢哋已經畀Gamania招攬！新作就係集可愛、華麗及萌元素於一身的《Tiara Concerto》。之前香港動漫節《Tiara Concerto》都曾經在港公開，到GGS就再加入新元素，好似今次帶來新角色歌姬「詩亞」的宣傳曲，但「詩亞」到底掌握住乜嘢秘密同關鍵，就要等稍後公布。至於GGS現場試玩版就提供海盜船上戰鬥的版圖，角色分別有擅於近距離戰鬥的「奏刃者」、用雙槍擅特擊的「擊曲手」，同能使出韻力魔法的「調音師」，由NPC船長帶領擊倒炮台，深入各層船艙救人質及要擊倒火獸Boss，難度未算高，只係最後要啟動冷卻裝置時有少許難度。值得一讚的，是遊戲音樂部分做得相當出色，而且可以簡單做出連續技，甚易上手。

類型：MMORPG

推出日期：預計2012年下半年

《蘭格利薩戰紀》經典日式遊戲重生

《Langrisser》係經典日本單機遊戲，Gamania將佢重新打造成Online版本《蘭格利薩戰紀》，而且更保留原有遊戲的日系風格跟日文介面。《Langrisser》只限玩家揀光輝勢力出戰，但Online版本就當然彈性更大，可經由經典的女神提問方式編入光輝勢力、帝國勢力或黑暗勢力。一開始時先要大家答女神所提問的問題，然後因應答案而編入3個唔同勢力。試玩時雖然已經預先分配咗唔同職業，但遊戲好強調兵種相剋系統，槍兵、騎兵跟步兵會互相產生牽制作用，要突破這掣肘，就取決於玩家會攜同邊個兵種的傭兵出戰，如角色係步兵的話就最好帶槍系傭兵出戰，互補不足。遊戲更強化《Langrisser》的職業樹系統，每條職業樹各有10種基本加上兩種隱藏的職業變化，就算在轉職後都一樣可以保留原有技能。

類型：MMORPG

推出日期：預計2012年第3季

《Dream Drops》玩轉童話可愛上位

前作《DIVINA幻月之歌》頗受好評，開發公司玩酷科技今次就以新MMORPG遊戲《Dream Drops》參戰。《Dream Drops》背景設計都幾特別，結合多套童話角色兼場景，再從中顛覆一番。例如遊戲兩大世界勢力原來係一身名牌兼傲慢的惡魔白雪公主跟變得正義的紅心王后，而GGS試玩版更可揀「永無島小勇士」、「糖果屋點心師」、「青鳥魔繪師」跟「胡桃鉗子兵」等不同版圖任玩，角色以多個童話故事角色為藍本，造型可愛而且可以換上其他經典童話角色服飾。小記試玩過以水底世界背景同點心屋版圖，畫面表現很好，只覺一般敵人比較弱，打兩吓就可幹掉。遊戲有趣之處在於公會設計，可以跟盟友恍如玩《SimCity》一樣自己建設及發展公會的規模，可因應公會壯大而興建更多具童話Feel的建築物，令玩家更有投入感，唔係淨接Job打怪獸咁單調。

類型：MMORPG

推出日期：預計2012年上半年

Dream Girls踩場

Gamania事先張揚會有明星巡場，到遊戲展的第2天，台灣宅男女神Dream Girls兩位成員李毓芬跟宋米秦於下午現身，繞場一周，所經之處都有大量相機狂影。至於另一成員郭雪芙點解冇嚟？應該同佢剛剛成為另一套Online Game的代言人有關。

試玩 跨平台遊戲

是次GGS主菜毫無疑問會係4隻新原創遊戲，但其實Gamania除咗Online Game之外，亦涉足Web Game、Facebook Game以至iOS Game。GGS會場就有多套跨平台嘅遊戲試玩，iOS遊戲方面就有已推出的《Hero:18》及《狩神傳》，而新嘅Facebook遊戲就有玩偶像育成的《Hito Star》以及玩模擬經營嘅《便利商店》，都係消磨時間嘅好選擇。

深入Gamania總壇

一場嚟到台北，就一定要深入Gamania位於新北市中和區的總壇。Gamania總壇不像外國Game Studio的獨立Building，而是設在一幢商業大樓之內，品牌中心、研發部門、機房、娛樂中心及餐廳皆分布在不同樓層，儼如一個小社區。當中最有趣的是新設立的人因設計中心（User Experience Lab），利用加裝在顯示屏上的視像鏡頭追蹤玩家眼球移動路徑，以及從單面玻璃觀察玩家反應，令到開發遊戲時更能貼近玩家的真正需要。另外Gamania更為旗下職業電競隊Gama Bears設置專屬訓練場，只見各位選手對住一大群傳媒圍訪時仍然全神貫注打機，彷彿超然物外，抵讚。