強勢德甲　撐上身

德國波真係愈嚟愈好睇？唔只國家隊贏到開巷，就連歐聯賽制都要重新洗牌，原本德甲同意甲分別擁有3個及4個（包括直接入圍及附加賽）參賽名額，喺2012-13年度就會掉轉，證明德甲嘅可觀性已經超越昔日有「小世界盃」之稱嘅意甲啦！講番今屆德甲，拜仁可唔可以武士復仇，利華古遜、史浩克04、漢堡，甚至紐倫堡又做唔做得成黑馬？以上球隊不但喺綠茵場鬥個你死我活，新球衣亦已在港上架，將戰火蔓延到球衣店，你又撐邊隊多啲？

金襯紅　拜仁貴氣爭冠

就算上季失落冠軍、今屆歐聯又要踢附加賽先入到圍，不過大家依然將拜仁慕尼黑當做奪冠熱門，除咗球隊買咗唔少勁人外，原來自1996-97德甲開始，拜仁從未試過連續兩年做唔到冠軍，難怪畀人睇高一線。新主場球衣就用咗紅、金雙色，別具王者風範，而且主場嘅領口及黑色作客嘅衫腳位，都印上球會口號「Mia san mia」，意思係「我們就係我們」，唔跟風、做自己，咁有性格，唔怪得有咁多Die Hard粉絲。

全民動員　力撐漢堡

講到同樣要知恥近乎勇，仲有上季排名第八嘅漢堡，作為唯一一隊參加過歷屆德國頂級賽事、又年年被視為奪冠黑馬嘅球隊，今年點都要爭氣啲，攞唔到冠軍都要爭入前列位置、將目標定喺下季歐洲賽嘅入場券啩！就好似主、客球衣都印上嘅德語標句—Alle Mann Auf Kursi，意思係全民站出來，由球會到球迷都要力撐球隊。

作客醒神　史浩克要回勇

多年嚟，史浩克04都被視為挑戰拜仁嘅熱門，不過上屆只得第14名，今屆當然要積極反撲，否則點對得住出晒名忠心又熱血嘅Gelsenkirchen球迷？今屆新主場球衣沿用傳統嘅藍色設計，特別在於領口用齊圓領及企領剪裁；至於第三作客款式就罕有用咗紫紅色，期望今屆史浩克嘅作客成績都可以令人眼前一亮啦！

同場加映　利華古遜VS紐倫堡

喜歡「鋤惡扶弱」嘅德甲迷，相信唔少都係利華古遜嘅粉絲，今年呢支德甲豪強要本土、歐聯雙線出擊，佢哋件紅、黑戰衣自然有唔少機會喺直播賽事現身。至於以蔗渣價錢換嚟燒鵝味道嘅紐倫堡，今年適逢創會111周年，新波衫玩暗間設計，唔似上季單色咁寡，衫領就印上德文Franken Steht Hinter Seinem Club，意思係「球會身後係整個法蘭肯」，法蘭肯即是球會的主場原名。

新波更易控

除咗換新衫，今屆德甲亦都換咗新款Official Match Ball，就係由adidas提供嘅Torfabrik 2。對比上屆用嘅紅、白雙色，Torfabrik 2改以白色為主，再襯紅、藍雙色，無論球員或球迷都唔再睇到眼花。用料及剪裁方面，大致上沿用去年世界盃嘅Jabulani，藉輕巧而加速球速，不過Torfabrik 2嘅表面布滿微細嘅三角形凸紋，加強控球效果及飛行時嘅穩定性。

查詢：2730 0157