哈日準媽媽：仙台老店冇驚喜

大地震，令日本仙台成為其中一個重災區，相信要多點時間才能再訪，但要吃地道的仙台滋味，在香港似乎不愁選擇，早前就有間仙台名店「多幸八」，落戶尖沙咀天文台圍，吸引不少名人食家如劉健威、少年食神Michael、黃柏高幫襯，哈日的準媽媽Blogger Yan亦聞風而至，跟肚內BB來食大餐，一試水準！

試食檔案

Yan憶述大學時代，第一次到北海道旅行，即被日本的風景、食物迷倒，覺得每樣東西都好靚好精緻，自此成哈日族。「那次到北海道，當然趁機大吃大喝，和牛甘香嫩滑，鱈場蟹鮮甜無比，仲有3.6牛乳滑溜溜，諗起都想食。之後就經常去日本旅行，見近排日圓升得太高，至暫時唔去住咋！」Yan話。

見Yan想食日本菜，即到這新店開餐，來到天文台圍，覺得環境清幽，餐廳門面好日式，不太似身在尖沙咀，即時加分。據資料顯示，這餐廳在日本仙台有30多年歷史，大廚加藤武朗是地道仙台人，曾在名店工作，最擅長炮製法國菜，所以菜式不乏洋式和食，像俄國燉牛肉、紅酒煮牛肉等，另有炸忌廉蟹餅、豬肉味噌燒、燒牛舌等名物，全都是今次試食重點，且就其食物、環境及服務來個測試吧！

Round 1食物質素 （*以10分為滿分）

豬肉味噌燒$70 8分

這道菜有驚喜，五花腩入口甜甜的，不會燒得乾硬，即使放涼食，仍然鬆化多汁。有沙律菜伴碟，平衡到味道。

燒牛舌$90 5分

仙台名物這次有點失準，因味道單調，只得一個鹹字，食幾件已經唔想食，牛舌有厚有薄，吃來肉質不一，有待改善。

吉列豬扒（鹿兒島豚）$150 6分

見網上食評有人讚，但若以鹿兒島豚肉炮製，就有點失望，因肉質偏實淨，而且外皮較厚，放涼了更出現外皮、豬肉分離的情況。

炸忌廉蟹餅配特製醬汁（自家製）$100 7分

除了蟹肉略少，基本上好好食，外皮炸得香脆，內裏Creamy，忌廉味濃郁，跟伴碟的醬汁幾夾，味道清新。

紅酒煮牛肉配特製牛肉醬汁（自家製）$230 7分

肉質鬆化，最鍾意帶點肥肉的，夠香口。紅酒味適中，不會下得重手有苦澀味，但此菜不算好特別。

Round 2環境 7分

天花有和式波波紙吊燈，一室淺木調，都是很傳統的日本餐廳模樣，不算太特別，但喜歡開放式廚房，可欣賞廚師烹調。無論是天文台圍，以至餐廳都比較靜，好適合幾個朋友來傾偈食飯，感覺輕鬆開心。

Round 3服務 6分

侍應服務態度OK，介紹菜式時都有問有答，不時斟茶兼收拾餐碟，但出現落錯單情況，要扣點分。飯後送上精美甜點，不錯。

網上食評達人Info

綽　　　號： Yan（花名甜魔會長）

寫Blog年資： 約7年

嗜　　　好： 四圍搵好嘢食、旅行、睇戲……

網　　　誌： http://blog.yahoo.com/

gourmet-yan/

哈日宣言： 鍾情精緻的食物，靚靚的日本菜就最合心意，擺設、配搭食材都出色，喜歡熟食，如鐵板燒、吉列炸物及串燒等。

總評：有賣點但不突出!

洋風和食有賣點，有市場，做得好不難大紅，但就當晚所試菜式，整體表現不算突出，沒太大驚喜。個人意見是餐廳將幾款招牌菜做好，便能增加吸引力，特別是牛舌，質素、定價不成正比，有點失望。

C