ChatRoom

家庭版 記者：Lum

現時小學生的功課，經常都希望有父母的參與，好像我6歲的姨甥仔早兩日交的中秋節功課，老師便要求他與父母一同製作燈籠，奈何我家姐與姐夫美術天分有限，於是四處「請槍」，結果自製燈籠的重責，便落在我老公身上。當晚他足足花了4個多小時，才完成這個四面雕花的燈籠，雖然造型、設計皆美，但我不禁問了一句：在這個設計複雜的燈籠上，一個小一的學生，能夠參與哪一部分呢？

家庭版 記者：Sammie H

話說自小學之後，已經無去過嗰啲乜乜戶外康樂中心，懶如豬的小記竟然答應友人，闢出一個星期日與大伙兒一同走去玩樂一番。本來都覺得呢個活動好鬼健康，之但係剛剛遇着啱啱，之前一晚有朋友生日，去咗天昏地暗狂歡派對，結果年紀漸長的我，拖着一個只瞓咗兩個鐘的身軀走去參與戶外活動，真係唔猝死都偷笑！不過，今次呢個活動，確實重拾不少兒時回憶，好似十幾年無玩過嘅射箭、乒乓球、羽毛球、好好玩嘅康樂棋，最正係學識咗打桌球，唔使再成日篤枱唔篤波啦！最傻豬嘅係，同友人踩水上單車時，我哋踩咗一陣就由得駕單車漂浮，浮吓浮吓去咗淺水地帶，要工作人員大叫咗好耐好耐（唔知叫了幾耐）：「小姐，小姐，好危險呀！快啲返過嚟，否則水退你哋返唔到嚟㗎啦！」我與友人即時狂踩返去，真係好鬼樣衰，哈哈……經過一日有益身心嘅活動之後，工作都起勁番晒！

家庭版 記者：Karen K

很多認識我的人都知道，我是牛油怪，嘿嘿！尤其愛夾在菠蘿油裏面那半硬未溶的牛油塊……一口咬下去實在令人難忘！不過，要嘗到那一口美味要好有技巧啊，吃過菠蘿油的人都知道，從它製成的一刻起，一兩分鐘之內，牛油就會完全溶掉了！最近一次偶然發現這個新發明─冰鎮菠蘿油！牛油分開上，置在一小碟冰上，這樣就不怕溶掉了！太高興了！以後可以繼續放肆瘋狂食！