SR勇者王 熱血回歸

細個有睇開「勇者系列」嘅動漫迷，仲記得當年逢禮拜六上晝追睇《勇者王Gaogaigar》嗎？劇中獅子王阿凱透過G-Stone合體變成Gaogaigar，由早期嘅「風起雲動拳」到後期嘅Goldion Crusher，每招都充滿爆炸力。最近Super Robot Chogokin系列唔只將Gaogaigar熱血回歸，仲有初回特典嘅Overload Effect特效組件，加埋武器套裝「勝利之鍵（Key of Victory） Set 1」，氣勢之強冠絕今期玩具界！

可動性高 QC睇唔緊

SR系列嘅Gaogaigar唔單止係勇者王，仲係甫士王！主體跟足原著造型，雙腳比例比雙手粗壯得多，不過咪以為會笨重郁唔到，反而可動性超高，最精彩係膝蓋有連動關節，小腿連接腳掌位又有雙重Ball Joint，屈膝、壓腿都So Easy，腳掌又落足Diecast組件，包保企得穩。至於雙手都有4重關節，配合拉出式膊頭設計，靈活性交足貨。然而首批來貨QC參差，唔少玩家都喺討論區反映水口粗糙、塗裝又麻麻哋，最大問題係右腳過鬆，希望下批貨嘅QC會執緊啲啦！

出絕招 買多盒Key

投訴還投訴，呢期逛信和及188等玩具熱賣點，都親眼見到SR勇者王去貨甚快，無計啦，事關實在太多嘢玩，令各位勇者迷甘願冒險。先講主體Gaogaigar，已經有用嚟扭曲空間嘅Protect Shade、旋風飛拳Broken Magnum，以及撕裂空間嘅Dividing Driver等重裝組件，而且換埋心口獅子頭兩側嘅鬈毛組件，仲可以擺出雙手緊扣嘅必殺技「風起雲動拳」。至於初回特典嘅綠色火燄組件Overload Effect，同SR勇者王拍埋一齊，有型指數Double上，鍾意幫玩具影沙龍嘅玩家，執相時都易得多。不過最毒都係同步上架嘅Key of Victory Set 1擴充配件，內有Goldion Hammer及巨腕Mag Part，裝落SR勇者王主體，就可以重現破壞空間嘅絕招「鋼鐵粉碎」，廠方仲事先張揚Set 2及Set 3都會排隊推出，勇者粉絲唔使旨意脫貧喇！

查詢：2433 1828（瑞華行）