EX雙子再Chok神話

人比人、比死人，諗番起2003年「聖衣神話」初推出時，由個樣到Body都令人眼前一亮，80年代出嘅聖衣大系完全冇得比；風水輪流轉，今年首度出擊嘅「聖衣神話EX」，頭炮雙子座撒卡（Cemini Saga）唔只個樣變得更Chok，可動性更加拋離神話系列幾個身位。就算你之前已經儲齊神話12宮，諗住從此以後修心養性絕迹玩具店，睇怕見過EX雙子座實物之後，想唔破戒都難！

包括筆者在內，好多星矢迷都以為EX只係神話嘅修改版，無非條腰幼咗、Body高咗、聖衣拉長咗、細位執靚咗而已，況且平心而論，神話版撒卡已經出得幾靚仔，又何須破費買EX？不過玩過實物後，相信大家都會改變初衷。首先面相又再Chok樣咗，面更尖、對眼又畫得更有神外，髮型亦做得更飄逸，更要命係變番原著咁白淨，膚色唔似神話版偏黃，邊個話美白係女士嘅專利？

平反！　瘦腰有道理

由之前嘅發布會到網上流傳嘅官方圖片，令全人類都知道「黃蜂腰」係EX嘅最明顯嘅修改之處，當初仲以為純粹想忠於原著、只求好睇，原來瘦腰唔係得個樣。以EX撒卡嘅聖衣為例，胸甲、腹甲及腰甲都係分件組裝而成，配合素體嘅幼腰特點，唔只令條腰可以左擰右擰，仲可以令上半身前後拗動，神話版本就做唔到，EX都算瘦得有道理。

激讚！　重現必殺技甫士

除此之外，EX撒卡喺肩甲及腰甲嘅連接位追加Ball Joint，大大增加聖衣向外揭起嘅幅度，尤其是肩甲多咗1組伸縮關節，連埋Ball Joint一齊用，可以大幅度向上揭起；以前聖衣神話受肩甲所阻，無法舉臂擺出絕招「銀河爆烈拳」嘅遺憾，EX終於做得到！另一方面，聖衣神話唔只關節易鬆，就連套上手、腳嘅聖衣組件，都好易鬆脫、移位，EX就統統實淨番晒，以往玩神話時一邊組裝、一邊甩件，又或者擺甫士時軟手軟腳等令人扯火嘅毛病，EX都一掃而空。

弧寒！　收起教皇裝束

做人要公道，EX撒卡雖然改得好，但未算完美，例如神話系列頭盔太大好難戴嘅問題，今次都未有改善；頭髮組件亦冇吸取到神話系列嘅教訓，下半節長髮依然好難組裝。最激氣係神話版撒卡有兩個素體，又送教皇裝束及王座，賣貴咗嘅EX竟然統統欠奉，唔通廠方想留番嚟出「魂Shop」附件賺多筆？不過對比起種種改善之處，筆者覺得都只係小問題，單憑出到銀河爆烈拳呢招，已經夠晒殺傷力啦！

擺甫士必備Display Stage

同步上架仲有EX專用Display Stage，隨盒除咗有3塊地台，主要組件包括唔同長短、又可以自由組合嘅支撐架，加埋拳風及踏地嘅特效組件，唔只可以穩穩陣陣撐起撒卡，仲對應將來嘅EX Figure，以及以前嘅聖衣神話，擺情景就方便得多。美中不足係做背景嘅銀河紙板太細、地台有裂紋但冇舊化，未夠逼真。

Chok樣繼續嚟

今年初Bandai宣布EX大計嗰陣，已經話明會出晒12宮，進度大約係2至3個月1款，即係話繼雙子座之後，今年仲有兩款EX登場，唔使估喇，廠方亦事先張揚係獅子座艾奧里亞（Aiolia）以及白羊座穆先生（Mu），分別喺10月及12月推出，加埋11月出嘅PS3遊戲《聖鬥士星矢 戰記》，星矢迷預咗下半年要銀包大出血啦！

查詢：2433 1828（瑞華行）