《Gears of War 3》殺無赦

Xbox 360射擊大作《Gears of War 3》講就講咗好耐，

前幾個月仲公開測試Multi-Player模式，隨着發售日期剩番唔夠4星期，

廠方就有愈來愈多堅料發放，好似新設計Horde 2.0持久模式；

而遊戲關卡設計師Jim Brown更加專誠飛到香港造勢，

即席示範玩遊戲第1版「Abandon Ship」場景兼3D試打，殺得勁爽快！

關卡設計師東來會傳媒

頭兩集《Gears of War》有幾勁，都應該唔使再花大量篇幅介紹，今集《Gears of War 3》都真係令人有望穿秋水嘅感覺，去年《Gears of War 3》已經在場內公開畀人試玩多人連線「Beast Mode」，以為好快出街，但點知推出日期延遲，搞到下月先面世。不過廠方都聰明地一直Keep住放吓新料吊玩家癮，如幾個月前的多人模式公開測試之類，到之前又放Horde 2.0持久模式呢單新料；日前，遊戲關卡設計師Jim Brown更東來會見傳媒，兼同機迷解畫，真係好有一眾粉絲心。

女兵Anya提槍上場

一向射擊遊戲都好重陽剛味，主角都係穿上特強盔甲的大隻肌肉男，《Gears of War》系列的第一男主角Marcus就係活生生例子。《Gears of War 3》就搞搞新意思，開發小組將上兩集都有份出場，但只係做通訊工作的靚女Anya推上戰場拎重型武器殺敵。關卡設計師Jim Brown就解畫，話上兩集人類世界仲存有希望，女兵都可以做吓後勤工作，但今集故事世界已經到咗十萬火急嘅境地，係人都要上戰場搏殺。聽落又大條道理，而且之前公開試玩，無論男男女女玩家都爭住用Anya，足證這條橋都幾Work！

故事模式變

今集故事發生在第2集完結後的個月，人類嘅最後城市已經陷落，新嘅敵人從地底湧出，人類生還者要在有限時間內集合眾人之力擊退新敵人。正因為要集眾人之力的緣故，《Gears of War 3》就首次可以在故事模式中採用設計，可經由Xbox Live連線同另外3位玩家一齊合作過關，就算玩之前兩集跳過故事模式直入多人模式，今次都可花啲時間煲吓故事內容。話晒第1集都已經係2006年出品，即使第2集都已經係3年前嘅事，就算唔係好記得成個故事來龍去脈都唔大問題，因為Epic Games特別設計一個介紹故事模式的網站（http://www.gearsofwar.com），有片、有相、有字兼以壁畫手法介紹3集中出場人物以及重要事件！

強化五十波賺錢買裝備

射擊遊戲最吸引人之處都係連線群揪，《Gears of War 3》亦大幅強化多人模式，先前都提過去年已有得試玩的「Beast Mode」多人合作模式，玩家唔扮人，而係扮演各種野獸攻擊人類，甚至可以打埋遊戲第一男角Marcus帶領的D小隊添！另外被玩家稱為「五十波」的Horde持久模式，到《Gears of War 3》時變身成2.0強化版本，除咗每波會出現Boss戰外，仲可以透過殺敵賺錢購買各式防衞裝備，唔使怕敵人一波又一波不停來襲；此外更會不時出現獎勵任務，可以賺到更多武器、彈藥同獎金，都頗有新鮮感，晚晚開波都唔會悶啦！

資深女機迷Kali 評《GOW3》

玩射擊遊戲打贏一大班男仔，而且仲攞過打機比賽獎項嘅女機迷Kali，會點評價《GOW3》？Kali玩過好多射擊遊戲，認為《GOW》系列的故事性、連線模式及新意方面的平衡性做得最好，唔似部分遊戲過分偏重連線模式，因此可滿足各類玩家的口味。女兵Anya亦帶畀Kali唔少新意：「其實好多男仔都想搶Anya嚟玩，而我亦都一定會霸住嚟用。感覺上Anya的命中率較男角弱少少，但用番女角打機會玩得更投入，啱我口味。」

Info

類　　型： 射擊

開　　發： Epic Games

平　　台： Xbox 360

推出日期： 9月20日

售　　價： $329（普通版）

$399（限定版）

查　　詢： 3071 4868