《Toy Story 3》 體感襟玩

《Toy Story 3》電影舊年暑假已經上畫，結果等到頸都長先有得玩！事關今次的行貨PS3版遊戲，不單止$200有找，售價吸引，而且更會推出連同PS Move動態控制器的遊戲套裝，可以玩埋新增的Move Add-On內容，都算得上係暑期親子活動的好選擇！

對應PS Move內容

當舊年《Toy Story 3》推出時，連PS Move都未有，所以今次行貨版玩埋Move Add-On內容，總算多點新意。遊戲內容跟電影版差不多，故事講述胡迪、巴斯光年的主人好快就要升讀大學，唔再玩玩具，於是打算將玩具轉送畀託兒所，因此胡迪、巴斯光年就要諗辦法逃走。遊戲採用開放式劇情設計，可以在地圖上隨意體驗電影中的冒險情節，完成任何一版後都可以返去重玩，以及蒐集隱藏遊戲卡，耐玩性都幾高。

溫馨提示協助過關

唔好以為《Toy Story 3》會遷就小朋友而降低遊戲難度，其實玩落一啲都唔易。例如要協助Jessie逃出房間嘅第二版，各位便要用力氣較大的巴斯光年，將胡迪跟Jessie拋到高處開啟機關，才可以完成任務，好考玩家智力；不過就算諗唔到辦法過關都唔使太擔心，事關遊戲會有貼心提示，玩家只要跟住提示再諗一諗，應該好快會有頭緒。

建設靚靚玩具王國

主線故事用上傳統手掣操作，不過為咗新增特別玩法，行貨版遊戲會加入Move專屬嘅Shooting版圖，需要用到PS Move動態控制器，玩法就如《LittleBigPlanet》般容易。除主線故事外，《Toy Story 3》還設有Toy Box版圖，可以畀大家發揮創意建設靚靚的玩具王國，角色互動又搞笑，但就要記得從遊戲中賺錢來購買道具！

類型：動作

開發：Avalanche Software

平台：PS3

發售日期：8月1日推出

售價：$198 （淨行貨遊戲）

   $499 （連PS Move動

      態控制器套裝）

INFO

類型：賽車

開發：Avalanche Software

平台：PS3

日期：已推出

售價：$328

《Cars 2》爆笑飛車

另一套唔可以錯過嘅暑期親子遊戲就係《Cars 2》，遊戲畫面跟電影版一樣咁靚。今集故事講述主角麥昆參加世界車王選拔賽，要巡迴日本、德國、意大利、法國跟美國各地鬥車，表面睇跟一般賽車遊戲差不多，但要知道《Cars》內每架車都好人性化，唔單止要鬥快過終點咁簡單，好似在倫敦比賽時，就因為拯救了一位英國情報員而捲入間諜飛車戰，過程都幾緊張刺激！查詢：2341 2356