《黃易群俠傳2 Online》 時空大兜亂

於2006年推出的《黃易群俠傳Online》，以一系列黃易老師武俠小說內的主角及場景為基礎，在台灣更創下最高19萬人同時在線的紀錄。今次續篇《黃易群俠傳2 Online》，除大幅強化畫面表現以及職業設定外，繼續玩時空大兜亂，遊戲Trailer上只見《尋秦記》主角項少龍揸住電單車打暴龍，真係誇張得緊要！

相對一般武俠式Online Game來說，《黃易群俠傳2》由於大玩時空轉移，題材上的限制相對較少，在結合《尋秦記》、《覆雨翻雲》同《大唐雙龍傳》等小說的同時，更有時光機、暴龍以至太空基地，真係估佢唔到！

噴血Cosplay造型

為隆重其事，遊戲發布會還請來黃宗澤同高海寧Cosplay遊戲角色，黃宗澤今次Cosplay嘅係《覆雨翻雲》內的主角浪翻雲，都係遊戲內嘅主要角色之一，拎住把長劍起勢劈，感覺都幾有型，原來宗澤以前拍劇時更飾演過浪翻雲的徒弟韓柏，今次Cosplay就升呢做師傅。由於武俠世界通常都係以男性做主角，所以高海寧惟有扮成遊戲六大職業之一的女道士，在遊戲中的特長係補血，但見到高海寧的性感造型後，玩家可能由補血變成噴血也不定。

自創個人化角色

今集遊戲設計有何不同？《黃易群俠傳2》強調多元化的職業架構，包括埋身戰鬥能力強的武士、治愈補血的道士、擅用魔法的幻魔、打造裝備及近距離戰鬥的工匠、能令敵人失明兼緩速的刺客以及擅長遠程攻擊的射手等6大基本職業，於此之上還設有12種二轉職業，兼且可以學到2大武學天賦及15種武器，要創製出獨一無二的角色並唔困難。同時遊戲亦強調自由配點玩法，在50級前都可自由地在力量、敏捷、體魄、精神、膽識及運氣等6大屬性中配置點數，試吓邊個組合最啱自己。升級系統亦有新設計，在1至30級時，每升一級可得2點；而在31至60級時，每升一級可得3點，Level升得愈高，就有更多點數去調整屬性，如此類推，點樣提升角色能力就睇大家喜好啦！

籠絡關係換珍寶

遊戲主線跟支線任務都幾豐富，隨住故事推進，可以接觸到「星際方舟」、「飛馬牧場」、「怒蛟幫」等十大陣營，角色跟場景設計都各有特色，如果跟某個陣營的關係搞得太僵，甚至變成仇恨或敵視的話，該陣營的NPC便會不時主動群起攻擊，補多幾次血都唔夠死。相反做Friend就着數得多，除可以購買到專屬道具外，亦能用特殊寶物兌換珍貴寶物。此外，遊戲系統方面亦經過強化，例如加入24人超大型副本，可蒐集怪物卡片、時空地圖、聲望經營、副本成長、成就魔輪等好玩元素，相當吸引。

INFO

類　　型：MMORPG

開　　發：中華網龍

平　　台：PC

封測日期：即日至7月26日

公測日期：8月5日