TF3 Dual Model Kit 唔變仲有型

美版變形金剛玩具有時為咗遷就變形Gimmick,難免要稍微改動機體設計,往往同電影版造型差少少。Takara Tomy最近就創先河,趁住《變形金剛3》(TF3)上畫,推出上色半完成模型系列「Dual Model Kit」,頭炮就係電影版柯柏文(Optimus Prime)及大黃蜂(Bumblebee),雖然犧牲咗變形設計,但係換嚟電影版嘅傳神造型,搞到冇砌開模型嘅老變迷都紛紛訂購,據聞炒價一度升到逾$1,000,比起Bandai模型嘅升值能力,真係尤有過之!

如果搵Bandai出柯柏文模型,就算分色有幾仔細都好,身上嘅火燄拉花圖案之多,唔出水貼都會用刮貼了事,睇怕會變成「貼紙地獄」,但係Dual Model Kit就好唔同,廠方已事先上定色、仲印埋拉花及細節位畀你,連輪胎都換埋橡膠料,落足誠意及本錢。不過作為模型初哥嘅Takara Tomy,實際組裝起嚟又掂唔掂呢?

預製骨架扭得爽

Dual Model Kit嘅特色之一係自家製可動骨架DKB,大尺碼嘅柯柏文骨架組件比較精密,做到大腿連動機關,膝部亦加入拉出式關節增強屈曲範圍;細隻啲嘅大黃蜂雖然組件較少,手腳只作單關節處理,但係膊頭有類似Ball Joint設計,雙肩又可以向前擺動,而且頸部內藏雙重關節。雖然Gimmick各異,但係兩款骨架出廠時已經啪好晒,一開盒就用得,慳番好多組裝時間。

精緻拉花懶人至愛

除此之外,幾乎所有裝甲組件已經分晒色,可以素組齋啪,模型初哥都應付到,初次出模型就玩到多色成形,Takara Tomy真係抵讚。更驚喜係柯柏文嘅膊頭、雙腳、手臂及左右胸甲嘅火燄拉花圖案統統印齊晒,而且有高清質素冇出界,至於油缸及死氣喉又有電鍍處理,連輪胎都係軟膠製作,加埋唔少細零件都預先塗咗銅色,啱晒鍾意砌模型但係怕上色嘅懶人。至於大黃蜂雖然冇電鍍件,不過估佢唔到連下盤嘅車牌號碼清晰可見,美中不足係組件「膠味」太重,想有番電影咁款嘅實戰Feel,可以先滲線、消光,再加埋油漬、銹迹等舊化處理就成事。

甩件嚴重令人惱

武器方面,柯柏文只有兩把透明大刀,大黃蜂仲寡到得一支激光炮,唔知廠方日後會唔會出加強版,補番電影中五花八門嘅刀槍大炮呢?不過相比起組裝及完成後擺甫士,配件少都只係小問題。首先水口位同組件太近,令剪件難度大增,剪件後亦無可避免留低大量水口位有礙觀瞻,而且有啲榫位更加要打磨過後先至組裝得到!最大問題係無論喺組裝過程,或者完成後想擺甫士,由於大部分嘅接口位都過鬆,遇到一舉身一投足,甚至只係好普通嘅屈臂動作,裝甲都會一邊郁一邊甩,搞到你愈玩愈忟憎,窩心建議係喺唔影響活動範圍嘅部件上,搽上膠水固定,盡量減少問題嘅嚴重性。

無論柯柏文或者大黃蜂,骨架已經事先砌好,玩家只需將裝甲裝喺骨架上就完成,介乎模型與完成品之間。

日本文哥着UNIQLO

無論模型或者完成品,今時今日有邊款玩具冇Crossover特別版?模型版柯柏文都唔例外,香港上架冇耐,日本嗰邊已經搵到UNIQLO合作,喺涉谷道玄坂店推出跨科版Takara Tomy DMK 01 Optimus Prime,構造同普通版一樣,不過裝甲就換成代表UNIQLO嘅紅、白雙色,仲有代表兩者Crossover嘅UTF字樣。可惜只屬日本本土限定商品,相信香港UNIQLO都幾難入到。

查詢:2302 1221(Hasbro HK)

Alfred

Takara Tomy DMK 01 Optimus Prime建議零售價:$839.9

Takara Tomy DMK 02 Bumblebee建議零售價:$359.9

為求逼真,機背油缸及死氣喉都用咗電鍍處理,連輪胎都係軟膠製作。

大腿有連動機關,膝部可以稍稍拉出,增加屈曲幅度。

腳掌可動位多達8個,令柯柏文嘅接地性大大提升。

雖然手指有3重關節,但係並冇套入榫位,所以超易鬆脫。

柯柏文嘅武器只得一對大刀,連機關槍都冇,削咗啲。

大黃蜂只得一支激光炮,勝在可以左右手任意換裝。

下盤嘅車牌號碼清晰可見,係大黃蜂雕功最精細嘅部分。

唔好睇小大黃蜂人仔細細,頭雕及胸甲上色都冇甩色出界。

單關節嘅手肘及膝部嘅可動範圍相當有限,不過車輪腳踭與腳掌就有作二重分件,聊勝於無。

雖然冇乜金屬效果嘅部件,不過透明車窗及軟膠輪胎都算交到貨。

靠換件形式,就可變成突擊作戰時嘅面罩形態。

柯柏文

大黃蜂