on.cc 東方互動主頁

推郵功能拍住電腦

放假約埋老婆仔女去度假，曬吓太陽，做吓Spa，呢種Hea爆生活邊個唔想！但作為打工仔，幾乎要24小時On Call，最慘係臨上機前一刻先接到緊急公務，冇帶電腦喺身，點算好？好在有部Nokia E6在手，唔單止內置Symbian Anna智能系統，上網查資料勁快，仲有觸屏、鍵盤兩種輸入方式畀你揀，配合埋推郵功能，收發Email分分鐘快過用電腦！

E Series向來係Nokia最強嘅商務機種，由E71到E72，部部大賣兼口碑極佳；然而自從Nokia減少對Symbian的支援後，今年就只出過E7一部新機，一眾粉絲吊晒胃口！等了又等，官方終於在早前的Nokia Connection發布會上，表示會加強投放在Symbian的資源，話口未完，首部E系Anna機—E6便正式登場！

白撞銀機身勁Grand

驟眼看，E6就好似E72嘅孖生細佬一樣，同樣配備QWERTY鍵盤，若不熟手機型號的話，的確很容易將兩者混淆。然而，作為後繼機，E6於背後做了大量微調，例如將屏幕加大至2.46吋，解像度提升至VGA質素，並跟隨主流，支援埋篤芒操作，可謂靚咗又實用咗。用色方面，它改用更大膽嘅白撞銀設計，而機身由邊框到電池都為不銹鋼物料，配合表面的霧化特效，成部機望落去閃令令，感覺勁Grand！惟留意的是，E6比E72重了5g，並取消了後者五向鍵內的光學觸控板，冇得再當Mouse使用，舊用戶或許要重新適應。

格仔鍵盤輸入快

講到電郵功能，E6能與Microsoft Outlook同步，並可透過Push Email功能，把Yahoo! Mail、Gmail或Mail for Exchange內的電郵，全部推送到主頁上顯示。至於打字速度，E6就配備了完整嘅QWERTY鍵盤，雖然格仔鍵Size連一根手指頭都冇，但勝在回彈力適中，清晰又易用。最重要是它支援筆畫及倉頡輸入法，打完仲有關聯字彈出嚟，玩起預載嘅Facebook同Twitter自然更得心應手。令人疑惑的是，既然E6配備了Touch Screen，但卻不支援手寫輸入，實在未能物盡其用。

5版Widget首頁

打字舒服，都要睇埋系統快唔快至得。E6係繼X7之後，第二款採用Symbian Anna嘅智能手機，其介面跟舊有嘅Symbian^3極為相似，但用落就會發覺運算同上網速度都快咗唔少；而有鑑於E6屏幕比X7細好多，官方特別為前者加多兩版主頁，每頁最多可放6個Widget，加加埋埋就放到30個，咁就算喺Ovi Store「單撈」多幾個Apps都放得落。另外，若想拍照留念，E6都準備了800萬像素後置鏡頭及30萬像素前置鏡頭，前者仲要採用全幅對焦技術，速度勁快，但影微距就唔得，不過在配合雙LED燈後，影夜景一定冇問題！