擔櫈仔排頭位必搶HT三雄

香港人嗜炒成癮，豪宅、車位、紅酒、唉瘋統統有得炒，不過唔知幾時開始，連玩具都炒埋一份，嗰頭先捱完金毛獅王超合金魂炒價，荷包啱啱先回氣，呢頭Hot Toys又出3款動漫節限定版Figure！先唔計灰色Iron Man Mark Ⅳ同首度曝光嘅Shadow Predator珍藏價值極高，必定有得炒外，連舊版Batman都搵嚟人氣頭雕師Kojun落刀，毒性甚深，玩具迷今個暑假慘受嘅經濟打擊真係浪接浪。

唔經唔覺，今年已經係HT喺動漫節攞Booth嘅第8個年頭，一如以往，廠商亦準備咗3款限定版Figure「回饋」大家。有鑑於去年排隊黨引起嘅混亂及炒賣問題，今年HT改為安排一眾VIP會員先去門市預購，再喺動漫節期間攞貨，其餘少量貨尾就安排喺動漫節首日以先到先得形式發售，令非會員都有機會買得心頭好。然而，當每款限量800套嘅時候，變相連訂定都有得炒，截稿前就收到風，一張$500嘅定單竟然炒到$2,000，認真誇張！唔想捱炒價，只好擔定櫈仔排頭位。

黑俠再來

MMS 155 1/6 Batman/Bruce Wayne

Batman一向係HT嘅長青系列，當中DX Joker不但奠定咗HT嘅神級地位，斷貨多時嘅《Batman Begins》蝙蝠俠，更加長居玩具炒賣市場嘅頭幾位。今次動漫節限定版同樣取材自第一集，其實就算咩都唔改，相信都會被搶購一空，不過HT都冇偷懶，搵嚟人氣頭雕師Kojun重新為Bruce Wayne落刀，再追加一組爬山背帶及忍者頭套，重現Bruce未變蝙蝠俠前嘅「原始」造型。至於橡膠Batsuit、腰帶及蝙蝠鏢等配件就沿用舊作，較特別係頭套Look會有3款新嘴形畀大家換，勝在表情多樣化。

炭灰鋼甲

MMS 153 1/6 Mark IV Secret Project

雖然蝙蝠俠已經係HT第6款同名作品，但比起Iron Man，前者仲差好遠。由Mark Ⅰ到Mark Ⅵ，再到各款戰損版及特別版，呢位奇俠大大話話出過十款有多，動漫節特別版又點少得佢？今次嘅Iron Man取名「Secret Project」，設計跟早年與Silly Thing合作嘅版本有啲相似，但就改用Mark Ⅳ為藍本，將顏色改為跟War Machine一樣嘅炭灰色，增加軍事味道，又避免再出現以往拋光面引發嘅甩色問題。然而，純改色嘅佢始終誠意唔算多，而且抽走原先有嘅冬甩，吸引力實在係三者中最遜色。

血獸新Body

MMS 154 1/6 Shadow Predator

Batman及Iron Man都算係HT嘅後起之秀，若果論資排輩，早喺陳年嘅MMS系列已經登場嘅Predator，算得上係HT Figure群中嘅「大大佬」！過往每年動漫節，都有新血獸同大家見面，今屆亦唔例外，出場嘅係第2集片尾中跟血獸家族一同亮相嘅Shadow Predator。由頭雕到Body，都交由本地著名生化造型師Joesph Tsang負責，單計呢點已經係信心保證。累積多次經驗，Joesph今次為血獸帶嚟全新Body，最大特色係取消舊版嘅腹部關節，雖然犧牲咗靈活性，但係令身體線條更完整自然，對於Figure擺多過玩嘅粉絲嚟講，反而係一項「德政」。

查詢︰2388 4677

（玩具狂熱）