大躍進BB Wing Gundam EW

以前玩BB戰士，買嘅時候鍾意佢頭大身細夠得意，但每當開盒準備開工嘅一刻，喜悅感就一掃而空，活動性低唔在講，最攞命係分件冇用多色成形，無論手掃或噴油都令人叫苦連天。最近推出嘅Wing Gundam EW（下稱BB Wing），廠方終於「的起」心肝解決問題，Size仲高過以前嘅BB戰士成個頭，易砌咗、好玩咗又有型咗，令離棄咗BB戰士好多年嘅筆者，今次都要回心轉意了。

由PG、MG到HG等有正常比例嘅高達模型，都用咗多色成形技術好多年，唔只方便上色，就算懶人一族玩「素組」都有唔錯效果。不過由20幾年前嘅「武者七人眾」到今日嘅「三國傳」，BB戰士都冇乜點用過多色成形，成隻模型只係由2、3種色，甚至單色嘅膠件組成，素組嘅話都幾肉酸，雖然有輔助貼紙，不過效果太假，除咗眼位，其餘根本用唔着；玩認真上色嘅話，往往係玩死自己，事關先要用遮蓋紙或者遮蓋液嚟逐Part遮遮掩掩，結果好易出錯要你從頭嚟過，想唔分手都唔得啦！

多色成形　上色準好多

令人失望咗咁多年，終於由BB Wing打破困局。呢款新BB戰士嘅整體質素堪稱脫胎換骨，甚至追貼HG，雖然仲未做到完全分件，不過膊頭、胸部內外層、前臂、腰甲以及腳掌都有好大程度用咗多色成形，慳番好多遮蓋紙，尤其是頭部分成內外層，玩家可以將內層眼位嘅綠色、眼底及嘴位嘅紅色，以及外層嘅白色分開上色及滲線，搞掂先至啪埋一齊，咁就唔怕髹出界啦！

有番對腳　唔再矮冬瓜

上色易咗之餘，BB Wing嘅活動能力，亦都係BB戰士嘅No.1。唔只全身用咗好多Ball Joint，膊頭嘅拉出式關節，以及手肘新增嘅活動位，喺以前嘅BB戰士身上都幾難搵到，雙臂終於可以隨意伸展，唔再淨係做「手直」模型了。除此之外，以往嘅BB戰士雙腳大多數只有腳板組件，再直接同腰部組合了事，BB Wing終於有番小腿，而且同腰部及腳板之間嘅連接位都用咗Ball Joint，每隻腳都比以前嘅BB戰士多咗一個關節位外，亦都令成隻BB Wing高咗，英咗之餘亦都Keep到大頭Cute Look。

後記：革命尚未成功

雖然BB Wing執靚咗好多，不過仲有唔少改進空間。好似雙翼嘅紅、白、藍位，鎖骨位嘅黃、黑色位，以及雙手嘅後備彈篋連底座位，都冇用到多色成形，仲有足踝嘅罅隙太大穿晒崩，附件又只得激光槍及盾牌，寡到連激光劍都冇，加埋唔少嘅偷膠位……其實以Bandai今時今日嘅製作技術，解決以上問題只係Easy Job。或者你會話BB Wing定價800日圓，已經比以前嘅同級BB戰士貴咗200日圓，做齊以上升級工程咪要過1,000日圓？論質素，壽屋嘅Q版模型確係好啲，所以一分錢一分貨，標價到1,800至2,000日圓，只要有誠意、有質素，相信大部分高要求嘅模型迷，都唔介意畀多少少。況且Bandai亦可將售價與質素掛鈎，為BB戰士分設高檔Line及入門Line，同時滿足大人向及兒童向嘅市場。無論Bandai有冇打算將其餘嘅W四子接棒BB化，不過筆者都衷心希望日後嘅BB戰士會繼續進步，起碼Keep番BB Wing嘅水平先對得住大家吖！

BB戰士No.366

Wing Gundam XXXG-01W EW

建議零售價：$89.9

查詢：2433 1828（瑞華行）